Joǵarǵy sot tóraǵasy alǵashqy ret azamattardy qabyldaý kúnin ótkizdi

dep habarlady QR Joǵarǵy sotynyń baspasóz qyzmeti.

Bul joly jańa Tóraǵanyń aldyna sharýasyn aıtyp kelýshiler Astana, Almaty qalalary, Ońtústik Qazaqstan, Aqmola, Jambyl, Atyraý oblystary jáne basqa da óńirlerden jınalǵan. Bektas Beknazarov ýaqytqa shekteý qoımaı, eshkimniń sózin bólmeı, úmit artyp kelgen barlyq azamattardyń aryz-shaǵym, usynys-pikirlerin ózderi qalaǵan tilde muqııat tyńdady. Osylaısha 27 adammen ótken jeke júzdesý 7 saǵatqa sozyldy.

Shaǵym aıtyp kelýshilerdiń máseleleri negizinen jer daýy, baspana alý mashaqaty, alashaq pen bereshek týrasynda boldy. Máselen, almatylyq Maıra Ketpenova jol apatynan kóz jumǵan ápke-jezdesiniń balalaryn qosqanda jeti bala asyrap otyrǵan ana. Baspanasyn satyp keńirek páter almaq bolǵan ol 35 myń AQSh dollaryn alaıaqtarǵa berip, aqyry aldanyp qalǵan. Endi bala-shaǵasymen dalada qalatyn túri bar. Jambyldyq Mınıýra Qulymbaevanyń da páter alam dep júrip basy daýǵa qalǵan. Ol baspana alyp berem dep ýáde etken adamdarǵa 70 myń AQSh dollaryn beripti. Keıin ne úıdiń, ne qarajattyń qarasy kórinbeı bara jatqan soń uly Rýslan Áınekov aqshany alǵan adamdardan istiń mán-jaıyn surap barǵan. Áńgimeniń arty urys-keriske ulasyp, aqyry Rýslan Áınekovke álimjettik kórsetti degen aıyp taǵylyp 8 jylǵa sottalǵan. Keıin onyń merzimi 3 jylǵa qysqartylypty. Osy kúnde Rýslan Áınekov jazasyn tolyq ótep shyqty. Anasy Mınıýra Qulymbaevanyń endigi maqsaty jas jigittiń taǵdyryna daq túsirgen sol aqshany óndirip alý.

Osy sekildi jaıttardyń barlyǵyn zeıin qoıyp tyńdaǵan Joǵarǵy Sot Tóraǵasy árbir is óziniń jeke baqylaýynda bolatynyn jáne aıaqsyz qalmaıtynyn jınalǵandardyń nazaryna saldy. Sonymen qatar barlyq isterdiń tyıanaqty zertteletinin jáne qorytyndysy týraly barlyq shaǵym aıtýshylarǵa jaýap qaıtarylatynyn aıtty.

Kezdesý barysynda sýdıalardyń, sot qyzmetkerleriniń jumysy týraly da sóz qozǵaldy. Tóraǵa ol jóninde Joǵarǵy Sottaǵy jáne jergilikti sottardaǵy jaýapty adamdarǵa naqty tapsyrma berdi. Eki tilde erkin áńgime qurǵan Tóraǵanyń yqylasyna qabyldaýda bolǵan jandar rıza bolyp tarqasty.

«Endi mundaı kezdesýler aldaǵy ýaqytta júıeli túrde ótip turatyn bolady», - dep atap ótti baspasóz qyzmeti.