Joǵarǵy sot tárkilengen ushaqqa qatysty isti qarap, birinshi satydaǵy sot sheshimin ózgertti
Joǵary sot baspasóz qyzmetiniń málimetinshe, «Fly Jet.kz» JShS 2020 jylǵy maýsymda Hawker 900HR áýe kemesin kedendik aýmaqqa ákelý kezinde kólik quralyn jáne ýaqytsha ákelýdiń eki aılyq merzimin kórsetip, kedendik deklaratsııany resimdegen.
«Kórsetilgen merzim ótkennen keıin JShS áýe kemesin alyp ketpegen. Merzimdi uzartý týraly ótinish memlekettik kiris organyna sol jyldyń tamyz aıynda, ıaǵnı ýaqytsha ákelý merzimi ótkennen keıin jiberilgen. Ýákiletti organ men sot quqyq buzýshynyń áreketin EýrAzEQ-tyń kedendik aýmaǵynan ýaqytsha ákelingen halyqaralyq tasymaldaý kólik quralyn áketpeý (ÁQBtK-niń 543-babynyń 1-1-bóligi) retinde saralaǵan.
JShS oryn alǵan osy quqyq buzýshylyqty moıyndaǵan. Bul rette, keme qozǵaltqyshynyń tsıfrlyq elektrondy jabdyǵynyń tehnıkalyq aqaýy ýaqytsha ákelý merzimin saqtamaýǵa sebep bolǵandyǵy týraly qujatpen rastalǵan málimetter usynylǵan», delingen habarlamada.
Baspasóz qyzmetiniń málimetinshe, sotqa aqaýdy joıý úshin qajetti jabdyqty ákelý týraly taýarlarǵa arnalǵan deklaratsııa (2020 jylǵy tamyz) tabys etilgen.
Birinshi satydaǵy sot JShS-ǵa 30 AEK (80 myń teńgeden astam) aıyppul salyp, áýe kemesin tárkiledi. Apellıatsııa osy sheshimdi ózgerissiz qaldyrǵan.
Joǵarǵy sot isti qarap, áýe kemesiniń menshik ıesi JShS emes, «Area Plus JV Limited» kompanııasy ekenin anyqtady.
«ÁQBtK-niń 45-babynyń 2-bóligine sáıkes, eger onyń Erekshe bóliginde basqasha kózdelmese, zań buzýshynyń menshigi ǵana tárkilenýge jatady. Buǵan qosa, kólikti tárkileý túrindegi jaza balamaly (mindetti emes) shara bolyp tabylady jáne ony qoldaný, qoldanbaý jaǵyn mán-jaılardy eskere otyryp, sot sheshedi.
ÁQBtK-niń Erekshe bóligi baptarynyń sanktsııalarynda jazanyń balamaly túri bolǵan kezde ákimshilik jazany daralandyrý qaǵıdatyn qatań saqtaýdy talap etedi. Sondyqtan sot jaza taǵaıyndaý kezinde quqyq buzýshylyqtyń mán-jaıyn eskerip, aldymen onsha qatań emes jazany, sodan keıin qatań jazany qoldaný múmkindigin qarastyrýy kerek», delingen habarlamada.
Joǵarǵy sottyń mamandandyrylǵan sot alqasy birinshi satydaǵy sottardyń sheshimderi men is boıynsha apellıatsııalardy ózgertti. Áýe kemesin tárkileý túrindegi qosymsha ákimshilik jazanyń kúshi joıyldy.