Joǵarǵy sot sýdıalary Ázerbaıjanǵa bardy

BAKÝ. QazAqparat - Búgin Qazaqstan Joǵarǵy sotynyń delegatsııasy Ázerbaıjanǵa keldi, dep habarlaıdy QazAqparat Joǵarǵy sot saıtyna silteme jasap.

Delagatsııa quramynda sýdıalar Nurjan Qaıypjan, Irına Kalashnıkova, German Nurbaev, Aslan Túkıev, Erbol Ómirálıev, departament ókilderi – Janat Bekjanov pen Arman Júkenov bar.

Bul sapar Amerıka advokattar qaýymdastyǵynyń (ABA ROLI) kómegimen uıymdastyryldy. Maqsat – ákimshilik ádilet júıesiniń jáne sottardyń qyzmetin uıymdastyrýshylyq-quqyqtyq qamtamasyz etýdiń oń tájirıbesin zerdeleý.

Delegatsııa múshelerimen Ázerbaıjan Joǵarǵy sotynyń tóraǵasy Ramız Rzaev kezdesti. Meımandarǵa joǵary sot organynyń ákimshilik alqasynyń jumysy tanystyryldy.

Advokattar alqasynyń basshylyǵymen de kezdesý ótti. Sonymen qatar, Qazaqstan sýdıalary Baký apellıatsııalyq soty men Sýmgaıt soty keshenine barady dep josparlanyp otyr.