Joǵarǵy Sot Keńesi avtonomdyq memlekettik mekeme retinde qaıta qurylady - Senat
Eske sala keteıik, buǵan deıin Májilistiń maquldaýynan ótken zań jobasy memlekettiń bes ınstıtýtsıonaldyq reformasyn iske asyrý jónindegi «100 naqty qadam» Ult josparyn atqarý maqsatynda ázirlengen. Qujatqa sáıkes, Joǵary Sot Keńesi Qazaqstan Respýblıkasy Prezıdentiniń sottardy qalyptastyrý, sýdıalardyń táýelsizdigi men eshkimniń tıispeý kepildikteri jónindegi konstıtýtsııalyq ókilettikterin qamtamasyz etý maqsatynda qurylatyn avtonomdy memlekettik mekeme bolyp tabylatyndyǵy aıqyndalǵan. Bul rette ony derbes mekemege qaıta qurý jolymen quqyqtyq mártebesi belgilenedi. Soǵan baılanysty QR Joǵarǵy Sot Keńesin jáne onyń apparatyn ustaýǵa arnalǵan shyǵystar respýblıkalyq bıýdjetten qarjylandyrylatyn bolady. Al Keńes apparatynyń basshysyn QR Prezıdenti taǵaıyndap, apparat týraly erejeni jáne shtat sanynyń lımıtin bekitedi.
«Keńes quramyna Joǵarǵy Sottyń Tóraǵasy, Parlament Senaty men Májilisiniń tıisti turaqty komıtetteriniń tóraǵalary, Bas Prokýror, Ádilet mınıstri, memlekettik qyzmet isteri jáne sybaılas jemqorlyqqa qarsy is-qımyl jónindegi ýákiletti organnyń basshysy, sýdıalar men otstavkadaǵy sýdıalar taǵaıyndalady. Sonymen qatar, onyń quramynda ǵalym zańgerler, advokattar, sheteldik sarapshylar, Sýdıalar odaǵynyń ókilderi taǵaıyndalýy múmkin», - dedi zań jobasy boıynsha baıandaǵan QR Joǵarǵy Sotynyń sýdıasy Aqyltaı Qasymov.
Onyń aıtýynsha, zań jobasynda laýazymy boıynsha Keńes músheleri men sheteldik sarapshylardy qospaǵanda, Keńes músheleri óz ókilettikterin júzege asyrý kezeńinde negizgi jumys orny boıynsha mindetterin oryndaýdan bosatylatyny belgilengen. Sýdıalar jáne memlekettik qyzmetshiler bolyp tabylatyn Keńes músheleriniń negizgi jumys orny boıynsha jalaqysy saqtalady.
Zań jobasyna talqylaý barysynda senatorlar tarapynan birqatar ózgerister engizý qajettigi týyndaǵan. Atap aıtqanda, depýtattar sýdıalyqqa kandıdattardyń jumys ótiline qoıylatyn talaptarǵa qatysty túzetý engizgen. Osyǵan oraı, qujat Májiliske qaıtaryldy.
