Joǵarǵy sot kassatsııalyq narazylyq negizinde 17 adamdy aqtady - Bas prokýratýra

NUR-SULTAN. QazAqparat – Bıyl Bas prokýrordyń kassatsııalyq narazylyǵy boıynsha Joǵarǵy sot 17 adamdy aqtady. Bul týraly Bas prokýratýranyń baspasóz qyzmeti málim etti, dep habarlaıdy QazAqparat.

«Ótken jyldardaǵy qylmystyq ister muqııat tekseriledi. Zań sottalǵan adamnyń jaǵdaıyn jaqsartý týraly másele qoıylǵan kezde, úkimderdi qaıta qaraýdyń merzimderin shektemeıdi.

Máselen, 16 tamyzda Joǵarǵy sot prokýrordyń kassatsııalyq narazylyǵy negizinde 2012 jyly jasóspirim kezinde QK-niń 328-baby (1997 jylǵy red.) boıynsha qylmys jasaýmen baılanysty bılik ókili ataǵyn óz erkimen bergeni úshin sottalǵan eki azamatqa qatysty qylmystyq qýdalaýdy toqtatty. Bul áreket úshin qylmystyq jaýaptylyq 16 jastan bastalady. Qylmys jasalǵan kezde A. 15 jasta bolǵan. Budan basqa, kiná dáleldemelerdiń jetkilikti jıyntyǵymen dáleldenbegen.

Sondaı-aq, qylmystyq quqyq buzýshylyqtyń eleýsizdigi 2019 jyly 6 myń teńgege azyq-túlik urlaǵany úshin kináli dep tanylǵan jas áıelge qatysty sot aktisiniń kúshin joıýǵa negiz boldy. Ol jalǵyz ózi eki jas balany tárbıelep otyrǵany anyqtaldy, olardyń eń kishisi bir jasqa tolmaǵan, sharasyzdyqtan urlyq jasaǵan. Zalal ustalǵannan keıin birden óteldi. Aýyr materıaldyq jaǵdaı, bolmashy zalal jáne ony tez arada óteý faktisi onyń is-áreketiniń qoǵamǵa qaýip tóndirmeıtindigin aıǵaqtady. Joǵarǵy sot qylmystyq qýdalaýdy toqtatty», - delingen resmı habarlamada.

Protseske qatysýshylardyń shaǵymdary, oblystar prokýrorlarynyń ótinishhattary jáne óz bastamasy boıynsha qylmystyq ister materıaldaryn tekserý jalǵasyp jatyr.