Joǵarǵy Sot qalta telefonyn shuqylaýmen otyratyn sýdıalardy synǵa aldy
«Jekelegen sýdıalar sot protsesin ótkizýge jetkilikti túrde kóńil bólmeıdi. Sot otyrystaryn keshiktirip bastaıdy, is materıaldarymen jaqsy tanys bolmaıtyndary da bar. Al keıbir sýdıalar sot otyrysy barysynda ózderin dóreki, ádepsiz ustaıdy, keıbiri protseske qatysýshylardyń beıádep áreketterine de mán bermeıdi. Máselen, aýdıo-beıne jazbalardy qaraý barysynda Qyzylorda oblystyq sotynyń sýdıasy sot otyrysynyń barysynda memlekettik aıyptaýshy ekeýi bastan-aıaq uıaly telefonyn shuqylap, qaraýmen otyrdy. Sosyn beınejazbany taldaý barysynda sýdıanyń bir jas azamatty ózine birneshe márte shaqyryp alyp, onymen uzaq ýaqyt boıy áńgimeleskeni kórinip tur», - deıdi Qaırat Mámı.
Joǵarǵy Sot tóraǵasynyń aıtýynsha, mundaı faktiler az emes. Bul rette tóraǵa, Joǵarǵy Sotqa jaqynda osyndaı máselege qatysty taǵy bir aryz-shaǵym túskenin alǵa tartty. «Bul shaǵymda da qylmystyq is boıynsha ótip jatqan sot protsesi barysynda prokýror búkil sot otyrysy barysynda óziniń uıaly telefonynan bas almaǵan. Al sotqa jetekshilik etken Almaty qalalyq sotynyń sýdıasy buǵan eshqandaı eskertý jasamaǵan. Osy shaǵym boıynsha beınejazbany qaraý barysynda ondaı faktiler rastaldy. Sýdıalardyń bundaı áreketteri búkil sot júıesiniń ımıdjine keri áserin tıgizedi. Osyǵan baılanysty, oblystyq sot basshylaryna mezgil saıyn barlyq sot otyrystarynyń aýdıo-beıne hattamalaryn qarap otyrýdy tapsyramyn», - dedi Q. Mámı. Bul rette tóraǵa sot otyrystary boıynsha joǵaryda kórsetilgendeı buzýshylyqtardyń qaıtalap oryn alýy jaǵdaıynda ondaı materıaldardy sýdıa etıkasy jónindegi komıssııaǵa jiberýdiń qajettiligin atap ótti.
