Joǵarǵy Sot kadr saıasatynyń tujyrymdamasyn ázirledi
ASTANA. QazAqparat - QR Joǵarǵy Soty kadr saıasatynyń tujyrymdamasyn ázirledi. Bul týraly búgin QR Joǵarǵy Soty sýdıalarynyń keńeıtilgen keńesinde QR Joǵarǵy Sotynyń Tóraǵasy Qaırat Mámı málimdedi. Eske salaıyq, keńes otyrysy «2015-2025 jyldarǵa arnalǵan sybaılas jemqorlyqqa qarsy strategııany iske asyrý aıasynda sot organdarynda sybaılas jemqorlyqtyń aldyn alýdyń negizgi baǵyttary» taqyrybynda ótken bolatyn.
Q.Mámıdyń aıtýynsha, 2014 jyly elimizde sýdıalarǵa qatysty qaralǵan ister sany 20 paıyzǵa, al tártiptik shara qoldaný boıynsha qozǵalǵan ister 14,3 paıyzǵa qysqarǵan. Sonymen qatar, 2013 jyly qylmystyq jaýapkershilikpen 8 sýdıa jazalansa, byltyr bundaı jaýapkershilikke 3 sýdıa tartylǵan.
«Memleket basshysy Sybaılas jemqorlyqqa qarsy strategııa men sybaılas jemqorlyqqa qarsy is-qımyl jónindegi Partııalyq baǵdarlamany bekite otyryp, jemqorlyq - ulttyq qaýipsizdikke tóngen joıqyn qater ekendigin aıtty. Jemqorlyqpen kúres - barsha Qazaqstan qoǵamynyń mańyzdy mindeti. Sot tóreliginiń minsiz júıesi memlekettiń sybaılas jemqorlyqqa qarsy tıimdi saıasatynyń sheshýshi quraly - quqyq ústemdigin qamtamasyz etý júıesiniń negizgi dińgegi bolyp tabylady», - deı kele Q. Mámı sybaılas jemqorlyqtyń tamyryna balta shabý boıynsha barlyq máseseler túbegeıli sheshim tappaı otyrǵanyna da nazar aýdartty.
«Alda úlken mindetter tur. Sýdıalardyń altynshy sessııasynda Ult kóshbasshysy jańa sapaly sot korpýsyn qalyptastyrýdy tapsyrdy. Osy maqsatta Joǵarǵy Sot kadr saıasatynyń tujyrymdamasyn ázirledi. Bul - sýdıalar jáne sot personaldarymen jumysty jetildirýge baǵyttalǵan keshendi qujat. Qujattyń quqyqtyq saıasatty zertteý ortalyǵynyń oń qorytyndysyn alǵan», - dedi Q.Mámı.
