Joǵarǵy sot ejelgi bılerdiń daý-damaılardy sheshý tájirıbesine súıene otyryp daıyndalǵan zań jobasyn qyrkúıek aıynda Parlamentke usynbaq
ASTANA. Mamyrdyń 21-i. QazAqparat /Aıdar Ospanalıev/ - Medıatsııa, ıaǵnı sot salasyndaǵy arazdasýshy taraptardy tatýlastyrýshy ınstıtýt jónindegi zań jobasy bıylǵy jyldyń qyrkúıek aıynda Parlamenttiń qaraýyna beriledi.
Bul týraly búgin Joǵarǵy sotta «Ekijaqty tatýlastyrý ınstıtýtyn engizýdiń ózekti máseleleri» atty taqyrypta ótken dóńgelek ústel otyrysynda Joǵarǵy sotty sýdıasy Vladımır Borısov málim etti, dep habarlaıdy QazAqparat.
Onyń sózine qaraǵanda, azamattar arasynda týyndaǵan daý-damaılardy balamaly túrde sheshý isi Qazaqstan úshin úlken jańalyq emes. Sebebi bul mindetti kezinde ejelgi bıler ınstıtýty atqarǵan. Onyń ústine qazaqtarda qalyptasqan úlkenderge, abyz-aqsaqaldarǵa degen qurmet erekshe. Olardyń sózderi qaı zamanda bolmasyn ótimdi bolǵan. Bul qazaq halqynyń ejelgi ómir súrý saltynan kele jatqan qundylyqtar. «Qoryta aıtqanda, biz búgin ejelgi bılerdiń tájirıbesinen bastaý alatyn, al qazirgi zamanda medıatsııa degen uǵymmen belgili, ekijaqty kelistirý tájirıbesin zańdastyrý máselesin qolǵa alyp otyrmyz», dedi Joǵarǵy sottyń sýdıasy.
Onyń aıtýynsha, atalmysh júıeniń qolǵa alynýy - eldegi demokratııalandyrý baǵytyndaǵy qaryshty qadamdardyń biri dese bolady. Sebebi kez kelgen memleket azamattar arasynda týyndaǵan daý-damaılardy múmkindiginshe sol azamattardyń ózderi sheshetindeı múmkindigi bar qoǵam qalyptastyrýdy qalaıdy. «Al medıatsııa tap
osy mindetti atqarady. ıAǵnı azamattar ózara týyndaǵan daý-damaılardy is sotqa joldanǵanǵa deıin sheshe alady. Ol úshin arazdasýshy taraptar medıatsııa ınstıtýtynyń kómegine júginip, ekijaqty kelisimmen medıatrdy tańdap alyp, sonyń sheshimine moıynsunady. Búgin biz osy máselege baılanysty zań jobasyn talqylaýdamyz. Bul osy ınstıtýtqa baılanysty ótip jatqan sońǵy talqylaýlar. Sebebi biz oǵan qatysty qujatty úshinshi toqsanda Parlament qaraýyna usynamyz, kelesi jyly ol kúshine de enip qalýy yqtımal», dedi Vladımır Borısov.
