Joǵarǵy Sot departamentiniń basshysy SQO sottarynyń jumysymen tanysty
PETROPAVL. QazAqparat - Joǵarǵy Sot departamentiniń basshysy Nurserik Sháripov Soltústik Qazaqstan oblysyna jumys saparymen bardy, dep habarlaıdy QR Joǵarǵy Sotynyń baspasóz qyzmeti.
Sapar barysyna aımaq sottarynyń materıaldyq-tehnıkalyq jabdyqtalýy men jumysyn uıymdastyrý máselelerine erekshe nazar aýdaryldy.
Nurserik Sháripovtiń Soltústik Qazaqstan oblysynyń ákimi Qumar Aqsaqalovpen kezdesýinde sottardyń jergilikti atqarý organdarymen ózara yntymaqtastyǵynyń perspektıvalary, sonyń ishinde jańa sot ǵımarattarynyń qurylysyna arnalǵan jerdi bólip berý máselesi talqylandy.
Sodan soń ol bir ǵımaratta ornalasqan Petropavl qalalyq №2 sotynda jáne Mamandandyrylǵan aýdanaralyq ekonomıkalyq sotta «Úlgili sot» jobasynyń aıasynda ashylǵan front-ofıstiń jáne medıatsııa kabınetiniń jumysymen tanysty. Osynda sýdıalardyń kómekshilerimen olardyń jumysynyń uıymdastyrylýy jóninde áńgimelesti.
Sondaı-aq N. Sháripov oblystyń Sottar ákimshisiniń qurylymdyq bólimshe basshylarymen jumys keńesin ótkizdi. Іs-shara barysynda olardyń jumysyndaǵy negizgi kórsetkishter boıynsha baıandamasyn tyńdap, jumysty jaqsartý boıynsha naqty tapsyrmalar berdi.
Іssapar baǵdarlamasyna sáıkes Soltústik Qazaqstan oblystyq sotynda Konstıtýtsııasy Kúnine oraılastyrylǵan saltanatty is-shara ótti. Departament basshysy óz sózinde merekeniń mańyzdylyǵyn jáne zańdarda kórinis tapqan konstıtýtsııalyq qundylyqtardy qorǵaýdaǵy sottardyń rólin atap ótti.
«Jyl saıyn sottardyń júktemesi artyp keledi. Sońǵy bes jylda ol eki eseden artyq 1,25 mln isten 2,7 mln iske deıin ósti. 2018 jyldyń 6 aıynda sottar 1,8 mln is pen materıal qarady. Bul el turǵyndarynyń óz daýlaryn sottarda sheshýge talpynatynyn bildiredi», - dedi N.Sháripov.
«Kúndelikti jumystan bastaý qajet: sot tóreligin protsestik zańnamaǵa qatań súıene otyryp iske asyrý, taraptarǵa shyǵarylǵan sheshimniń mánin túsindirý, sot aktilerin saýatty jazý qajet», - dep atap ótti Departament basshysy.
Osydan keıin birqatar sýdıalar men sot qyzmetkerlerine Qurmet gramotalary men vedomstvolyq marapattar tabystaldy.
Saltanatty jıynnan soń aımaq sýdıalarymen jáne sot qyzmetkerlerimen jumys keńesi ótti. Keńes barysynda sýdıalar korpýsynyń ókilderi aımaqtyń sot júıesi qol jetkizgen sońǵy jetistikteri týraly baıandady.
