Joǵarǵy Sot «BAQ-pen ózara is-qımyl tujyrymdamasyn» qabyldady

ASTANA. QazAqparat - Memleket basshysy sýdıalardyń altynshy sezinde bergen tapsyrmalardy oryndaý maqsatynda «Sottardyń buqaralyq aqparat quraldarymen ózara is-qımyl tujyrymdamasy» qabyldandy. Joǵarǵy Sot tóraǵasynyń tıisti ókimimen bekitilgen atalǵan qujatty barlyq oblystyq jáne olarǵa teńestirilgen sottar oryndaýǵa mindetti.

Tujyrymdama sot júıesiniń ashyqtyǵyn odan ári arttyrýǵa baǵyttalǵan.

Tujyrymdamanyń jobasy qoǵamda keńinen talqylaný úshin Joǵarǵy Sottyń ınternet-resýrsynda aldyn ala ornalastyrylyp, birqatar múddeli qoǵamdyq uıymdarǵa joldandy. «Ádil sóz» sóz bostandyǵyn qorǵaýdyń halyqaralyq uıymy, «Internıýs», Qazaqstannyń jýrnalıster odaǵy, Bas redaktorlar klýby, EQYU-nyń Astanadaǵy baǵdarlamalar keńsesi tujyrymdamaǵa qoldaý bildirdi.

Tujyrymdama jobasy «100 naqty qadam - barshaǵa arnalǵan qazirgi zamanǵy memleket» Ult Josparynda bekitilgen mindetter men kelip túsken eskertýler, sondaı-aq áleýmettik jeliler men ınternettegi aqparattyq saıasatty iske asyrý turǵysynan pysyqtaldy.

Tujyrymdamada sottardyń mass-medıamen ózara jumysy boıynsha aǵymdaǵy ahýal taldanyp, sottardyń BAQ-pen ózara is-qımylynyń negizgi qaǵıdattary men maqsat-mindetteri aıqyndaldy.

Tujyrymdamanyń negizgi mindetteri - turǵyndardyń sottarǵa degen senim deńgeıin arttyrý, osy jumysqa sot korpýsynyń ókilderin tartý, sot júıesiniń qyzmeti týraly aqparattyq materıaldardy ázirleý sapasyn jaqsartý, BAQ ókilderin sot aqparatymen jumys isteý erekshelikterine oqytý.

Shyǵarylǵan naqty sot aktisiniń logıkasyna mán bere otyryp, sýdıalar jumysynyń erekshelikterin túsindirý úshin úılestirýshi-sýdıalardyń qyzmetin jańa deńgeıge kóterý josparlanyp otyr. Atap aıtqanda, sottyń aqparatyn buqaraǵa jetkizý jáne neǵurlym rezonansty ister boıynsha túsiniktemeler berý bóligindegi resmı ókildiń mindetterin oryndaý úılestirýshi-sýdıalarǵa júkteletin bolady.

Tujyramdamany iske asyrý sheńberinde sýdıalyqqa kandıdattardy qarastyrý barysynda Sottarmen ózara is-qımyl jónindegi keńester jumysynyń aqparattyq ashyqtyǵyn arttyrý máselelerine aıryqsha nazar aýdarylady. Atalǵan Keńesterdiń quramynda BAQ jáne qoǵamdyq uıymdar ókilderiniń bolýyna mán beriledi.

Sottardyń qyzmeti týraly aqparattyq materıaldardyń sapasyn arttyrý maqsatynda sot protsesterin jarııalaý úshin BAQ ókilderine olardyń sot otyrysy zaldaryna qoldanystaǵy zańnamaǵa sáıkes kirýin qamtamasyz ete otyryp, aýdıo, beıne jazbamen qamtamasyz etilgen baspasóz ortalyqtaryn qurý múmkindigi qarastyrylýda.