Joǵarǵy sot Aqtóbe oblystyq soty basshysynyń ústinen túsken shaǵymǵa qatysty pikir bildirdi

ASTANA. QazAqparat - QR Joǵarǵy sotynyń baspasóz hatshysy Bolat Kalıanbekov Aqtóbe oblystyq soty basshysynyń sýdıalyq etıka kodeksin buzǵany týraly habarlamaǵa qatysty pikir bildirdi, dep habarlaıdy «QazAqparat» HAA tilshisi.

«Joǵarǵy sottyń baspasóz hatshysy retinde Aqtóbe oblystyq sotynyń tóraǵasy M.Áketaıǵa qatysty jaǵdaıdy túsindirip ketsem deımin (...) Shynynda da, bir top sýdıanyń atynan M.Áketaımen sýdıalyq etıka kodeksiniń júıeli túrde buzylǵany týraly shaǵym kelip tústi. Eki baǵyt boıynsha - sýdıalyq etıkany saqtaý jáne sýdıalar kórsetken naqty sot isterine zańsyz aralasýǵa qatysty tıisti tekserý jumystary bastaldy», - dep jazady B.Kalıanbekov óziniń Feısbýk paraqshasynda.

Onyń aqparatyna sáıkes, birinshi baǵyt - sýdıalyq etıka boıynsha Joǵarǵy sot Komıssııasynyń jelisimen tekseris 2018 jyldyń 13 naýryzynda aıaqtalǵan.

«Tekserý qorytyndysy boıynsha Komıssııa otyrysynyń aldynda M.Áketaı óz laýazymynan bosatý týraly ótinish jazdy. Qabyldanǵan ótinishti qazirgi ýaqytta zań boıynsha Joǵarǵy Sot keńesine tapsyrý baǵytynda protsedýra júrgizilip jatyr», - dep túsindirdi QR Joǵarǵy sotynyń baspasóz qyzmetinen.

Sonymen qatar, ol taǵaıyndaý, bosatý, sýdıalardy tártiptik jazaǵa tartý - zańnama boıynsha retteletin qatań protsedýra ekenin eske saldy.

JSK sýdıalardy taǵaıyndaý jáne irikteýdi iske asyratyn derbes memlekettik organ. Joǵarǵy sottyń tóraǵasy JSK múshesiniń biri bolyp tabylady. Onda sheshim jalpy daýys boıynsha shyǵarylady. Dál sol Joǵarǵy Sot keńesimen sýdıalardy ornynan bosatý týraly Memleket basshysyna keńes beriledi.