Joǵarǵy sot 60 myń teńge jymqyrdy dep aıyptalǵan áıeldi aqtady
ASTANA. QazAqparat - Joǵarǵy sottyń Kassatsııalyq alqasy aqsha jymqyrdy dep jaýapqa tartylǵan A.Sıtınany aqtap shyqty, dep habarlaıdy QazAqparat Joǵarǵy sottyń baspasóz qyzmetine silteme jasap.
Sottalýshy qurylys materıaldaryn satatyn dúkenge satýshy bolyp jumysqa ornalasqan. Dúken ıesimen eńbek qatynasy zańdy túrde rásimdelmegen. Aı saıyn 60 myń teńgeni qolma-qol tólep turatyny jóninde aýyzsha kelisken. Odan keıin dúken ıesi ýaqytsha qıyndyqtardy sebep etip, A. Sıtınanyń jumys istegen ýaqytyna jalaqy tóleýden bas tartqan. Dúken qojaıyny onymen daýsyn kóterip, qatty-qatty sóılegen.
Sol kezde A. Sıtına kassada jatqan 100 myń teńgeden 60 myń teńgeni ruqsatsyz alyp, bul aqshany jalaqy esebinde alǵanyn aıtyp, qolhat jazady. Sosyn qolhat pen dúkenniń kiltin sol jerge qaldyryp, ózi jumys ornynan ketip qalǵan.
A. Sıtına 60 myń teńgeni ıemdenip ketkeni úshin jaýapqa tartylyp, 1 jyl 6 aıǵa bas bostandyǵynan aırylǵan bolatyn. Kassatsııalyq sot alqasy sottalýshynyń áreketinen qylmystyq quqyqbuzýshylyq quramyn tappady.
«A. Sıtınanyń barlyq aıyptar boıynsha aqtalýyna baılanysty sot aktileriniń kúshi joıyldy», dep habarlady vedomstvodaǵylar.
