Joǵarǵy Bas qolbasshy: Brondy tehnıka, ushqyshsyz basqarylatyn apparattar – munyń bárin ózimiz shyǵara alamyz
ASTANA. QazAqparat - Memleket basshysy – Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev áskerı qyzmetshiler aldynda sóılegen sózinde áskerdi joǵary tehnologııalyq qarý-jaraqpen jáne sapaly áskerı tehnıkamen jaraqtandyrý máselesin atap ótti, dep habarlaıdy QazAqparat Aqordanyń baspasóz qyzmetine silteme jasap.
Prezıdenttiń pikirinshe, bizdiń áskerimiz kásibı deńgeıi joǵary, utqyr jáne eń kúrdeli jaýyngerlik tapsyrmalardy oryndaýǵa daıyn bolýy qajet.
– Ol úshin áskerdi joǵary tehnologııalyq qarý-jaraqpen jáne sapaly áskerı tehnıkamen jaraqtandyrý, oq-dárilermen tolyqtaı qamtamasyz etý aıryqsha mańyzdy. Jaqynda jarııalaǵan Joldaýymda men jergilikti ónim úlesi joǵary óndiris tsıklin qurýdy tapsyrdym. Brondy tehnıka, ushqyshsyz basqarylatyn ushý apparattary, zamanaýı atys qarýlary – munyń bárin biz ózimizde shyǵara alamyz. Jalpy, qorǵanys-ónerkásip kesheni áskerimizdiń jaýyngerlik qabiletine senimdi tirek bolýy qajet, – dedi Memleket basshysy.Aıta keteıik, Memleket basshysy Qasym-Jomart Toqaev Almaty oblysynda ótip jatqan «Batyl toıtarys-2023» strategııalyq komandalyq-shtabtyq áskerı oqý-jattyǵý jıynyn baryp kórdi.
