Joǵarǵy attestattaýdyń nátıjesinde quqyq qorǵaý organdary joǵary basshylyǵy quramynyń úshten biri jańarady.

Bul týraly búgin Aqordada QR Prezıdenti Ákimshiliginiń quqyq qorǵaý júıesi bóliminiń meńgerýshisi Alık Shpekbaev málim etti.

Onyń atap ótýinshe, respýblıka boıynsha barlyǵy 98 myń 617 laýazymdy tulǵa attestattaýdan ótýi tıis. Búgingi kúnge deıin joǵary attestatsııalyq komıssııanyń 9 otyrysy ótip, 349 qyzmetkermen áńgimelesý uıymdastyrylǵan. «Olardyń ishinen 280 adam, ıaǵnı 80 paıyzy attestattaýdan ótti. 24 adamdy kadrlyq rezervke turǵyzý usynymy berildi. 69 qyzmetker, ıaǵnı 20 paıyzy attestattaýdan ótken joq. Olardyń ishinen 29 adam jumystan bosatýǵa, 28-i laýazymyn tómendetýge, 12-si basqa qyzmetke aýystyrýǵa usynyldy», - dedi A. Shpekbaev

Máselen, onyń atap ótýinshe, zańnamany bilýge testileýden ótý barysynda 15 qyzmetker qajetti shekti mánnen óte almady. Attestattalatyn 16 adam dene shynyqtyrý, 45 adam atys daıarlyǵy boıynsha synaqtan ótken joq. 10 adamda psıhologııalyq ornyqtylyqtyń tómen deńgeıi tirkeldi. Joǵarǵy attestatsııalaý komıssııasy qoıatyn joǵary talaptardy eskergen 26 qyzmetker kezekten tys attestattaýdan ótýden bas tartty.

«Sonymen ótkizilgen attestattaýdyń nátıjesinde quqyq qorǵaý organdary joǵary basshy quramynyń úshten bir bóligi jańarady. Joǵary attestattaý komıssııasy jumysynyń nátıjeleri boıynsha Elbasyna quqyq qorǵaý organdarynyń qyzmetkerlerin materıaldyq jáne áleýmettik qamtamasyz etýdi arttyrý, sonymen qatar quqyq qorǵaý organdarynda zańnamany jáne kadr saıasatyn jetildirý týraly usynystar engizildi», - dedi A. Shpekbaev.