Joǵarǵy sot: Tramptyń Aq úıdegi áreketteri úshin jartylaı ımmýnıteti bar

ASTANA. KAZINFORM – AQSh Joǵarǵy soty burynǵy prezıdent Donald Tramptyń Aq úıde bolǵan kezde jasaǵan áreketteri úshin qýdalaýdan jartylaı ımmýnıtetke ıe boldy dep sheshti. Sheshim Tramptyń 2020 jylǵy saılaý qorytyndylaryn buzýǵa qatysty sóz baılasý boıynsha sot isin keıinge qaldyrý jáne oǵan qarsy basqa da isterge áser etýi múmkin, dep habarlaıdy VVS. 

Sot tóraǵasy Djon Roberts prezıdenttiń qyzmet kezinde jasaǵan resmı áreketteri úshin qýdalaýdan «absolıýtti ımmýnıteti» bar ekenin aıtty. Immýnıtet beıresmı áreketterge qoldanylmaıdy jáne aıyptyń qyzmettik nemese beıresmı áreketterge qatystylyǵyn anyqtaý úshin is tómengi satydaǵy sotqa jiberiledi.

Tramp bul sheshimdi demokratııanyń jeńisi dep atap, áleýmettik jelidegi paraqshasynda amerıkalyq ekenin maqtan tutatynyn jazdy. Úsh lıberaldy sýdıa bul sheshimge qarsy shyǵyp, ony prezıdenttik ınstıtýtty ózgertetinin jáne demokratııaǵa qaýip tóndiretinin málimdedi.

Prezıdent Djo Baıden muny qaýipti pretsedent jáne zań ústemdigin buzý dep atap, eshkim, tipti prezıdent te zańnan joǵary emes ekenin aıtty.

«Bul el Amerıkada patshalar joq degen qaǵıda boıynsha qurylǵan. Zań aldynda bárimiz birdeımiz. Eshkim, tipti AQSh prezıdenti de zańnan joǵary emes. Búgingi sheshim árıne, prezıdent jasaı alatyn is júzinde eshqandaı shekteýler joq degendi bildiredi. Bul topty Kapıtolııge jibergen adam sol kúni bolǵan oqıǵa úshin qylmystyq jaýapkershilikke tartyldy. Amerıka halqy óz jaýabyn aldaǵy saılaýǵa deıin sottan alýǵa quqyly. Endi búgingi sheshimge baılanysty bul ekitalaı bolady», - dedi Baıden dúısenbige qaraǵan túni teledıdarda sóılegen sózinde.

Aqpan aıynda Joǵarǵy sot Tramptyń saılaý qorytyndylaryn joqqa shyǵarǵysy keletin is boıynsha ımmýnıteti joq degen sheshimge shaǵymyn qaraýǵa kelisti. Arnaıy prokýror Djek Smıt apellıatsııalyq protsess keıinge qaldyrylady dep qorqyp, sottan aralasýdy surady. Immýnıtet týraly sheshim shyqqansha sot otyrysy keıinge qaldyryldy.