Joǵarǵy sot sýdıasy: Taǵaıyndaǵan eń aýyr jazam — atý

ASTANA. KAZINFORM — Jibek Joly telearnasynyń «Ýáde» baǵdarlamasyna suhbat bergen Joǵarǵy sot sýdıasy, Sýdıalar tóraǵasynyń tóraǵasy Sáken Abdolla qyzmet barysynda taǵaıyndaǵan eń aýyr jazasy jaıly aıtty.

«Azamattyq isterdi de, qylmystyq isterdi de qaradym. Sanaǵan emespin, alaıda, 23 jyl az emes. Qylmystyq isterdi qaraǵan kezdegi eń aýyr jaza taǵaıyndaǵanym — atý jazasy. Ol kezde oblystyq sottyń sýdıasy edim. 1993-1994 jyldary bolýy kerek. Ońtústikke jaqyn azamattardyń esinde shyǵar. Shymkent men Tashkent tas jolynda taksısterdi ustap, býyndyryp óltirip, kólikterin ıelenetin úlken top bolǵan. Eki adamǵa qatysty atý jazasyn berý týraly úkim shyǵardym. Úkim barlyq satydan, Joǵarǵy sottan ótkennen keıin Prezıdentke barady. Sodan keıin Prezıdent bekitip, atý jazasy oryndalady. Jaza oryndalǵannan keıin saǵan qaǵaz keledi. Soǵan deıin maǵan óte aýyr boldy. Moratorııge deıin bolǵan jaza edi. Ol kezderi otyzdyń ar jaq, ber jaǵyndaǵy azamatpyn. Kúni-túni uıyqtamaǵan, ýaımdaǵan, basqa da dúnıeler boldy», — dedi sýdıa. 

Sonymen qatar ol taǵy bir jantúrshigerlik qylmysqa baılanys ólim jazasyn keskenin aıtady.

«Anasynyń sińlisiniń, bylaısha aıtqanda apasynyń úıine barady. Úıdi tonap jatqanda apasy kelip qalyp ony óltiredi. Ketip bara jatqan kezde 4-5 jastaǵy bólesiniń tereze perdesin ashyp qaraǵanyn baıqap, úıge qaıtyp kiredi de sábıdi óltiredi. Oǵan da atý jazasyn berdim. Ol kezde qandaı aýyr is bolsa da, ony bir sýdıa ǵana qaraıtyn», — de eske alady Sáken Abdolla.