Joǵarǵy sot Sherzat isi týraly: Almaty oblysynda otyrysty BAQ ókilderin qatystyryp ótkizý múmkindigi bar

ASTANA. KAZINFORM – Joǵarǵy sot Kazinform saýalyna joldaǵan jaýabynda Sherzat Polattyń ólimine qatysty sot otyrysyn ashyq ótkizýdiń múmkindikteri týraly ustanymyn bildirdi.

«Qylmystyq is qylmystyq quqyq buzýshylyq jasalǵan jerdegi sotta qaralýǵa jatady (QR QPK 314-babynyń 1-bóligi). Almaty oblysynda sot otyrystary ashyq ótkizilýi jóninde sheshim qabyldanǵan jaǵdaıda, BAQ ókilderiniń qatysýymen tıisti deńgeıde ótkizý múmkinshiligi bar. Jýrnalıster ashyq sot protsesine qatysa otyryp, protseske qatysýshylardyń derbes derekterge quqyqtaryn qorǵaýdy eskere otyryp, tóraǵalyq etýshi sýdıanyń ruqsatymen sot zalynan aqparatty BAQ-qa taratýǵa quqyly», - dep jazylǵan jaýapta.

Sot organyndaǵylar ázirge Sherzat Polattyń ólimine qatysty is-materıaldary sotqa túspegenin eske salǵan. 

«Osyǵan oraı sottyń ashyq ótýi týraly usynystar túsken joq. Protsessýaldyq zańnamaǵa sáıkes onlaın-translıatsııa týraly sheshimdi is boıynsha tóraǵalyq etýshi sýdıa protseske qatysýshylardyń pikirlerin eskere otyryp, qabyldaıdy (QR QPK 345-babynyń 6-bóligi, QR APK 19-babynyń 7-bóligi)», - dep jazdy Joǵarǵy sot ókilderi.

Buǵan deıin Almaty oblysynyń prokýrory Berik Adamov Sherzat Polatqa qatysty sot protsesin onlaın ótkizý týraly ótinish beretinin aıtqan edi.