BQO-da jer silkinisi aımaǵyna kiretin eldi mekender ataldy

ORAL. KAZINFORM — Batys Qazaqstan oblysynda 1 naýryz — Dúnıejúzilik azamattyq qorǵanys kúnine oraı birqatar is-sharalar josparlanyp otyr.

BQO TJD azamattyq qorǵanys basqarmasynyń bastyǵy Rýslan Sharıevtiń óńirlik kommýnıkatsııalar qyzmeti alańynda ótken brıfıngte málim etkenindeı, bıyl ataýly kún «Turaqty jáne qaýipsiz bolashaq úshin ekologııalyq táýekelderdi basqarý» uranymen ótedi.

Onyń sózine qaraǵanda, BQO ákiminiń orynbasarymen bekitilgen is-sharalar josparyna sáıkes TJD balalar men jastar arasynda azamattyq qorǵaý salasyndaǵy bilimdi nasıhattaýǵa, sondaı-aq azamattyq qorǵanys obektileriniń jumys isteý turaqtylyǵyna úlken mán beredi.

Osyǵan baılanysty joǵary oqý oryndarynda, mektepter men balabaqshalarda jáne basqa da bilim berý uıymdarynda arnaıy sabaqtar, oıyndar, jarystar, konkýrstar uıymdastyrylady. Olardyń barysynda qatysýshylar ózin-ózi qorǵaýdyń qajetti daǵdylaryn ıgeredi, túrli daǵdarystyq jaǵdaılar týyndaǵan kezde ózin qalaı qutqarýdy jáne basqalardy qutqarýdy úırenedi.

— «Seısmıkalyq aımaqtarda qurylys» erejeler jınaǵyna sáıkes Batys Qazaqstan oblysynyń aýmaǵynda qarqyndylyǵy 5-6 ball bolatyn jer silkinisi aımaǵyna 9 eldi meken kiredi. Bular — Oral qalasy, Jańaqala, Kaztalov, Bókeı ordasy, Tasqala, Terekti, Aqjaıyq, Shyńǵyrlaý jáne Báıterek aýdany, — dedi R.Sharıev.

BQO aýmaǵynda sońǵy jer silkinisi 2008 jyly 26 sáýirde Terekti aýdanynyń Rybtseh, Shalqar, Ersary jáne Saryómir eldi mekenderinde bolǵany belgili. 

Basqarma bastyǵy jer silkinisi bola qalǵan jaǵdaıda eń aldymen sabyr saqtaý kerektigin, lıftini qoldanbaý, baspaldaqpen júrmeý, ǵımaratty jedel bosatý jáne basqa saqtyq sharalaryn eske saldy.

Eske sala keteıik, budan buryn sý tasqynyna daıyndyq barysynda BQO-nyń birqatar aýdanynda tehnıkalyq sany sáıkes kelmeı otyrǵanyn jazǵan edik.