Joǵarǵy sot oqýshynyń mektepke oramal taǵýyna salynǵan tyıymnyń kúshin joıdy

ASTANA. KAZINFORM — Qazaqstandyq zańger Jaslan Aıtmaǵanbetov oqýshy qyzdyń oramal taqqany úshin mektep qabyrǵasynda bilim alýyna shekteý qoıý máselesin kóterip, Joǵarǵy sotqa júgingen. Osy is boıynsha sheshim qabyldandy.

«Joǵarǵy sot oqýshy qyzdardyń oramal taqqany úshin mektepte bilim alýyna shekteý qoıý máselesine núkte qoıdy. Joǵarǵy sot osy sheshimimen oblystyq sot qaýlysynyń kúshin joıyp, tyıym balalardyń bilim alý quqyǵyn buzatynyn moıyndady. Mundaı sheshimdi buǵan deıin 4 oblystaǵy sottar da moıyndaǵan edi. Qalaı bolǵanda da, sot bıligi mınıstrliktiń ustanymyna emes, zań normalaryna qaraıtyny qýantady», — degen jazba jarııalady zańger áleýmettik jelidegi paraqshasynda. 

Osy oraıda istiń mán-jaıyn Joǵarǵy sottan surap bildik. Vedomstvo bul málimetti rastady. 

«Sheshim qabyldandy, 10 jumys kúni ishinde qaýly shyǵady», — delingen Joǵarǵy sottyń ákimshilik ister jónindegi sot alqasy hatshylyǵy taratqan aqparatta. 

Aıta ketsek, mektepterde hıdjab kııýge ruqsat berý máselesi elimizde birneshe jyldan beri talqylanyp keledi. 

Buǵan deıin Oqý-aǵartý mınıstri Ǵanı Beısembaev oqýshylardyń mektepke hıdjabpen kelýine qatysty bylaı degen edi:

«Konstıtýtsııa boıynsha Qazaqstan — zaıyrly memleket. Mektep te zaıyrly bolyp sanalady. 2016 jyly bekitilgen oqýshylardyń mektep formasy men kıimine qatysty buıryq bar. Ol ózgergen joq. Sondyqtan balalar bilim ordasyna mektep formasymen kelýi kerek». 

Sondaı-aq, Premer-Mınıstrdiń orynbasary Tamara Dúısenova jumysta hıdjab kııý máselesine pikir bildirdi.