Joǵarǵy Sot: elektrondy bilezikter jıi qoldanyla bastady

ASTANA. KAZINFORM - Bıylǵy jyldyń 10 aıynda ǵana sottar zań buzǵan adamdarǵa 505 ret elektrondy bilezik taǵý sharasyn qoldanǵan, dep habarlaıdy QR Joǵarǵy sotynyń baspasóz qyzmeti.

Жоғарғы сот отырысы
Фото: ҚР Жоғарғы сотының баспасөз қызметі

Baspasóz qyzmetiniń málimetterine qaraǵanda, Joǵarǵy sottyń qylmystyq ister jónindegi sot alqasynyń tóraǵasy Nazgúl Rahmetýllına shartty túrde merziminen buryn bosatý jáne jazanyń ótelmegen bóligin jazanyń neǵurlym jeńil túrimen aýystyrý, sondaı-aq qamaýǵa alý túrindegi bultartpaý sharasyn sanktsııalaý týraly materıaldardy sottardyń qaraýy máseleleri jóninde dóńgelek ústel ótkizdi.

Dóńgelek ústel jumysyna Joǵarǵy Sottyń sýdıalary, Parlament Májilisiniń depýtaty A.Quspan, Respýblıkalyq advokattar alqasynyń (RAA) tóraǵasy A.Bıkebaev, «Atameken» UKP basqarma tóraǵasynyń orynbasary G.Bıjanova, sondaı-aq Bas prokýratýranyń, ІІM Qylmystyq-atqarý júıesi komıtetiniń jáne RAA ókilderi qatysty.

Qatysýshylar sottardyń qamaýǵa alýǵa sanktsııa berýden bas tartýynyń úlestik paıyzy jyl saıyn turaqty ósip kele jatqanyn atap ótti.

Eger 2021 jyly sottar qamaýǵa alý týraly ótinishhattardyń 90%-ǵa jýyǵyn qanaǵattandyrsa, 2024 jyly – tek 75%-yn ǵana qanaǵattandyrǵan.

Sonymen birge, qamaýǵa alýdan bas tarta otyryp, sottar úıqamaq pen kepilge alýdy jıi qoldana bastady.

2021 jylmen salystyrǵanda úıqamaǵyn tańdaý 860-tan 1911-ǵa deıin nemese eki eseden astamǵa, al kepilge alý - 4 esege (59-dan 214-ke deıin) ósti.

Bıyl Joǵarǵy Sottyń bastamasymen elektrondy bilezik dep atalyp ketken jazalaý túrin qoldaný jobasy qolǵa alyndy.

2024 jyly elektrondy baqylaý quraldary úıqamaqqa alynǵandardyń 60 paıyzynda qoldanylǵan bolsa, 2021 jyly bul kórsetkish 3 paıyzdan aspaǵan.

Shartty túrde merziminen buryn bosatý jáne jazanyń ótelmegen bóligin neǵurlym jeńil jazamen aýystyrýdyń ózekti máseleleri de atap ótildi.

«Dóńgelek ústeldiń qorytyndysy boıynsha atalǵan ınstıtýttardy qoldaný praktıkasy boıynsha tıisti usynymdar ázirlendi»,-delingen habarlamada.

Osyǵan deıin Qazaqstan sýdıalarynyń sezinde Joǵarǵy sot tóraǵasy Aslambek Merǵalıev Joǵary sot keńesi úzdik halyqaralyq standarttarǵa jaýap beretin organǵa aınalǵany týraly aıtqanyn jazǵan edik.

 

Сейчас читают