Joǵalyp ketken Mı-8 tikushaǵyn izdestirý sharalaryna qatysyp otyrǵan Almaty oblysynyń qutqarýshylary eholottyń kómegimen Alakóldi tekseredi
ASTANA. 27 qarasha. QazAqparat - Aǵymdaǵy jyldyń 24 qarashasynda joǵalyp ketken Mı-8 tikushaǵyn izdestirý sharalary jalǵasýda.
QR Kólik jáne kommýnıkatsııa vıtse-mınıstri basqaratyn izdestirý jáne qutqarý boıynsha úılestirý ortalyǵy qyzmet jasaıdy.
QR TJM-niń baspasóz qyzmetinen habarlaǵandaı, Almaty oblysy boıynsha tótenshe jaǵdaılar departamentiniń janynda jedel shtab jumys isteýde. Sondaı-aq jedel qutqarý toptary quryldy, olar aǵymdaǵy jyldyń 24 qarashasynan beri basqa qurylymdarmen birigip joǵalyp ketken tikushaqty izdestirýde.
3 tikushaq jergilikti mekendi tekserip, baqylaýda. Yrǵaıty aýdanynyń taýly mekeni, Jońǵar Alataýy shyǵys jotasynyń batysynan Alakól aýdanynyń Qabanbaı kentine deıin, Jońǵar jotasynyń soltústik-batys ýchaskesinen Qabanbaı aýylyna deıingi taý shatqaly, Dostyq stansasynan Alakól kóliniń ońtústik jaǵalaýyna deıingi ýchaske, Shyǵys Qazaqstan oblysy Altyn-Emel mańyndaǵy taýly meken, Alakól jáne Jalańashkól kólderi arasyndaǵy ýchaske, sondaı-aq ShQO Altyn-Emel taý ýchaskesi baqylaýǵa alyndy.
Almaty oblysy boıynsha TJD sýda qutqarý qyzmeti eholottyń kómegimen 2 qaıyqpen Aqshy aýylynan 50 metr qashyqtyqtaǵy Alakól kóliniń batys jaǵalaýynyń ońtústik bóligine deıingi aralyqty tekserýde.
