Joǵalyp ketken malaızııalyq Boeing ushaǵynyń janarmaıy taýsylyp qalǵan
ASTANA. QazAqparat - «Malaızııa avıajelisiniń» Boeing 777-200 laıneriniń janarmaıy taýsylyp qalǵan syńaıly. Budan keıin ol Úndi muhıtyna qulaǵan. ITAR-TASS-tyń habarlaýynsha, bul týraly Avstralııa kólik qaýipsizdigi agenttiginiń mamandary málim etti. Olardyń paıymdary spýtnıktik aqparatty taldaýǵa negizdelgen. Birneshe kún buryn ol malaızııa bıliginiń baıandamasynda jarııalandy.
Málimetterge sáıkes ushaqtan dybystyq dabyldar ol joǵalyp keter aldynda irkilispen kelip turǵan. Budan ári áýe kemesimen baılanys múldem joǵalǵan.
Bul ushaqtyń elektrondyq júıesine janarmaı jetispeýi sebebinen dabyl úzilip qalǵan degen boljam jasaýǵa múmkindik beredi, dep sanaıdy sarapshylar.
Sonymen birge olar ushaqty izdeý aımaǵy bul aýdandaǵy birden bir M641 avıatsııalyq baǵytymen toǵysady degen pikirde. Bul baǵyt avstralııalyq Pert portynan Kokos araldaryna deıingi jolbaǵytty kórsetedi. Laıner osy jolbaǵytpen avtopılot arqyly qozǵalǵan, dep atap ótedi mamandar.
Kýala-Lýmpýrdan Beıjińge ushyp shyqqan Boeing 8 naýryzda túnde radardan joǵalyp ketken. Ushaqtyń jáne onyń jolaýshylarynyń taǵdyry jóninde áli kúnge deıin eshteńe belgisiz bolyp otyr. Onyń bortynda ekıpaj múshelerin qosqanda 239 adam bolǵan.
