Joǵalyp ketken Almaty qalasynyń turǵyny baılanysqa shyqty
ALMATY. QazAqparat - 4 sáýirde joǵalyp ketken almatylyq áıel týysqandarymen baılanysqa shyqty. Bul týraly «QazAqparat» tilshisine onyń sińilileriniń biri habarlady.
Joǵalyp ketken Tahmına Emerovaǵa týysqandary «qaıda ekenińdi aıt» degen syńaıda úzdiksiz sms hattar jiberip otyrǵan.
«Ol baılanysqa ózi shyqty, biz habarlamalar jetkenin kórdik. Birazdan keıin ózi telefon shalyp qaıda júrgenin jáne jaǵdaıynyń jaqsy ekendigin aıtty», - deıdi Tahmınanyń týystary.
Onyń joǵalyp ketý sebepterin jaqyndary jarııalaǵylary kelmedi jáne izdeýge qatysqandardyń barlyǵyna óz alǵystaryn bildirdi.
Esterińizge sala keteıik, osyǵan deıin 41 jastaǵy Almaty qalasynyń turǵyny joǵalyp ketkendigi jarııalanǵan. 4 sáýirden beri odan eshqandaı habar bolmaǵan.
