Joǵalyp ketken AirAsia ushaǵyn izdestirý jumystary qaıta jandandy
ASTANA. QazAqparat - Malaızııalyq AirAsia áýekompanııasynyń joǵalyp ketken ushaǵyn izdeý búgin, dúısenbi kúni tańerteń jańǵyrtyldy, dep habarlady www.interfax.ru.
Jeksenbi kúni túnde izdestirý operatsııasy toqtatylǵan edi.
Іzdestirý jumystaryn Indonezııa basqarady. Joǵalǵan avıalaınerdi izdeýge 12 keme, úsh tikushaq, bes áskerı ushaq tartyldy. Operatsııaǵa malaızııalyq ÁÁK S-130 ushaǵy, úsh korabl, Sıngapýrdyń S-130 ushaǵy qatysýda.
Avstralııa izdeý jumystaryna AP-3C Orion kóligin jiberdi. «Ushaq izdestirý-qutqarý operatsııalaryn júrgizý salasynda joǵary kórsetkishke ıe. Teńizdik izdestirý radarymen, vızýaldyq baqylaý úshin ınfraqyzyl, optıkalyq aspaptarmen jaraqtalǵan», - dep málimdedi avstralııalyq ÁÁK Bas qolbasshysy marshal Mark Bınskın. Sonymen qatar, AQSh-ta kómek kórsetýge daıyn ekendikterin málimdedi.
Indonezııada Sıngapýrǵa QZ8501 reısimen baǵyt alǵan Airbus-320-200 ushaǵy jergilikti ýaqyt boıynsha saǵat 06:17-de (Máskeý boıynsha 02:17), ushqysh sońǵy ret dıspetcherden marshrýt ózgertýge ruqsat suraǵannan keıin radar ekranynan ǵaıyp boldy.
Indonezııalyq BAQ ushaq muhıtqa qulaǵanyn, sol jerden synyqtary tabylǵanyn habarlady. Avıakompanııanyń habarlaýynsha, pılot týrbýlent aǵysy kúshti bolýyna baılanysty baǵytty ózgertýdi suraǵan. Malaızııa Kólik mınıstrliginiń sarapshylary jańa marshrýtqa aýysqan ushaqqa otyn jetpeı qalýy múmkin dep sanaıdy.
Avıakompanııa basshylary ushaq apaty jaıly resmı aqparat taratýǵa ázirge daıyn emes. Malaızııa men Indonezııanyń resmı ókilderi muhıtta tabylǵan ushaq synyqtary jaıly aqparatty teriske shyǵaryp otyr.
Avıakompanııa basshylyǵy jeksenbi keshke jolaýshylar men ekıpaj músheleriniń ulttyq quramyn anyqtady. Jolaýshylardyń ishinde 149 ındonezııalyq, bir sıngapýrlyq, bir malaızııalyq, Ońtústik Koreıanyń úsh azamaty men bir aǵylshyndyq bolǵan. Ekıpaj quramyn 1 frantsýz, alty ındonezııalyq quraǵan.
