Joǵalyp ketken 72 jastaǵy keıýana tabyldy - Petropavl
PETROPAVL. QazAqparat – Petropavlda úıinen belgisiz baǵytqa shyǵyp ketip, iz-túzsiz joǵalǵan 72 jastaǵy zeınetker aman tabyldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 1948 jyly týǵan Lıýbov Harıtonovany polıtseıler men volonterler bir táýlik boıy izdedi. Ol 1 shilde kúni saǵat 13.00-de Petropavldaǵy Jumysshy kenti Lazýtın kóshesindegi úıinen belgisiz baǵytqa shyǵyp ketken. Zeınetkerdiń joǵalǵandyǵy jóninde týystary habarlady. Umytshaqtyq aýrýyna shaldyqqan keıýana qalanyń ekinshi aýmaǵynda, Benzostroı kentinde tabyldy.
«Ekinshi kúni Benzostroı aýdanynda tabyldy. Ónerkásiptik aımaqqa shyǵyp ketipti. Temirjoldyń boıymen ketip bara jatqan. Endi bolmaǵanda qaladan shyǵyp ketedi eken. Tabylǵan kezde «qaıda bara jatyrsyz?» dep suraǵanda, «úıge bara jatyrmyn» dep aıtty. Toqtaýsyz júre bergen syńaıly», - deıdi SQO PD baspasóz hatshysy Dınara Saǵyndyqova.
