Joǵalyp ketken 18 jastaǵy almatylyq qyzdyń týystary úndeý jarııalady
ALMATY. QazAqparat - Joǵalyp ketken 18 jastaǵy almatylyq qyzdyń týystary úndeý jarııalady, dep habarlaıdy QazAqparat tilshisi.
Árip Nazerke sońǵy ret Tuzdybastaý aýylyndaǵy úıinen 10 shilde kúni túski saǵat 14:00-15:00 shamasynda shyǵyp ketken. Sodan úıine qaıtyp oralmaǵan. Qazirgi tańda Medeý aýdandyq ІІB Árip Nazerkege izdeý jarııalady.
8 táýlik boıy qyzynan habar-oshar kelmegen soń onyń ata-anasy qazaqstandyqtarǵa úndeý jarııalady.
«Eger Siz bizdiń qyzymyzdy ustap otyrsańyz, qomaqty syılyqqa qaıtarýyńyzdy suraımyz. Biz eshkimdi qýdalamaımyz. Biz úshin qyzymyzdyń úıge oralǵany ǵana qajet. Qyzym, Nazerke, eger osy habarlandyrýdy oqyp otyrsań, úıge qaıta ǵoı. Sen bizge óte qajetsiń, biz seni jaqsy kóremiz, seniń ata-anań men baýyrlaryń ózińdi asyǵa kútýde», - deıdi qyzdyń týystary.
Telefon qońyraýlary detalızatsııasynyń málimetteri boıynsha Nazerke sońǵy ret Gýrılev 27 mekenjaıynda 40 mınýttaı otyrǵan. Keıin túngi saǵat 23:00-der shamasynda Aısha bıbi 356 mekenjaıynda bolǵan. Atalǵan mekenjaıda shaǵyn dámhana men avtojýý orny bary anyqtaldy.
Sońǵy ret Nazerkeni túngi saǵat 12:00 men 1:00-der shamasynda dámhana qyzmetkerleri kórgen.
Olardyń aıtýynsha, qyz jylaǵan kúıi jol boıyna júgirip shyqqan. Sodan beri eshkimniń kózine túspedi.
Jaqyndary Nazerkeniń nelikten habarlaspaı jatqanyna dal bolyp otyr. Ol bıyl mektep bitirip, UBT-dan jaqsy ball jınaǵan. Boıjetken qalaǵan oqýyma túsemin dep umtylyp otyrǵan.
«Úıde eshqandaı urys-keris daý janjal bolǵan joq. Tipti urysqan kúnniń ózinde mine úshinshi kún qatarynan joǵalyp otyr. Habarlasatyn edi ǵoı. Dostary túgel izdep jatyr. Jaman ádetteri joq. Múlde beıhabarmyz. Ony kórgen-bilgen adam bolsa habarlassynshy, ótinemiz», - dedi ápkesi Dana Raqym.
Qazirgi tańda Nazerkeni izdeý jumystarymen Medeý aýdandyq ІІB aınalysyp jatyr. Al otbasy músheleri men týysqandary, janashyr adamdar Aısha bıbi kóshesiniń mańyndaǵy taý-tas, ózen-kólderdiń arasyn tintip jatyr.
