Joǵalyp ketken alyp tasbaqalar 180 jyldan keıin Galapagos araldaryna qaıta oraldy

ASTANA. KAZINFORM — Alyp tasbaqalar Ekvadorǵa tıesili Galapagos arhıpelagyndaǵy Floreana aralyna qaıta oraldy. Janýarlar aralǵa shamamen 180 jyldan keıin qaıta jiberilip otyr. Ǵalymdarǵa NASA-ǵa tıesili spýtnıkter kómektesken, dep habarlaıdy «MIR24».

Spýtnıktik derekterdiń kómegimen mamandar araldyń qaı aımaqtary tasbaqalar úshin eń qolaıly ekenin anyqtaǵan. Negizgi faktorlar – ósimdik jamylǵysy, ylǵaldylyq deńgeıi jáne uıa salýǵa qolaıly oryndar. Galapagos ulttyq saıabaǵynyń basshylyǵy 20 aqpanda popýlıatsııany qalpyna keltirý maqsatynda Floreana aralynyń eki aımaǵyna 158 alyp tasbaqany jiberdi.

Tasbaqalar bul óńirden XIX ǵasyrdyń ortasynda joıylyp ketken. Oǵan kıt aýlaýshylar, sondaı-aq shoshqalar men egeýquıryqtardyń olardyń jumyrtqalaryn jep qoıýy sebep bolǵan. Tasbaqalar joǵalǵannan keıin araldyń tabıǵı landshafty da ózgeriske ushyraǵan.

Alyp tasbaqalardy qaıta jiberý – aral ekojúıesin qalpyna keltirýge baǵyttalǵan aýqymdy jobanyń bir bóligi. Mamandar egeýquıryqtar men jabaıy mysyqtar sııaqty ınvazııalyq túrlerdi joıýdy jáne jergilikti janýarlardy qaıta oraltýdy josparlap otyr.

«Tasbaqalardyń aralǵa oralýy – mańyzdy oqıǵa. Sońǵy ret olardy munda Charlz Darvın kórgen», dep keltiredi jobanyń jetekshi zertteýshileriniń biri Djeıms Gıbbstiń sózin The Guardian basylymy.

Aıta keteıik, Qazaqstanda sırek kezdesetin janýarlar tizimine taǵy 11 túri engizilmek.