Joǵalyp bara jatqan Amazonııa taıpasynda sábı dúnıege keldi

ASTANA. KAZINFORM — Brazılııany mekendeıtin Akýntsý halqynyń urpaǵy sońǵy birneshe onjyldyqta jalǵaspaǵan. Amazonııanyń Rondonııa shtatyndaǵy baıyrǵy taıpa 1980-jyldary tolyǵymen derlik joıylyp, munda uzaq jyldar boıy úsh áıel ǵana aman qalǵan, dep habarlaıdy Associated Press.

Pýgapııa men onyń qyzdary Aıga men Babavrý kóp jyldar boıy akýntsý halqynyń sońǵy ókilderi boldy. Olardyń qaýymdastyǵy Amazonka terrıtorııalaryn ıgerý jónindegi memlekettik naýqan kezinde tolyǵymen joıyldy. 

Alaıda byltyr jeltoqsan aıynda jaǵdaı kúrt ózgerdi. Úsh áıeldiń kishisi, shamamen qyryq jastaǵy Babavrý uldy boldy. Sábıdiń esimi — Akyp. Onyń dúnıege kelýi tek akýntsý tuqymynyń jalǵasýyna ǵana emes, sonymen birge Amazonkanyń baıyrǵy halyqtary men ormandaryn saqtaý úshin úlken kúrestiń sımvolyna aınaldy.

— Bul bala akýntsý halqynyń tabandylyǵynyń sımvoly ǵana emes, sonymen birge barlyq baıyrǵy halyqtar úshin úmit kózi, — dedi Brazılııanyń Funai baıyrǵy halyqtardyń quqyqtaryn qorǵaý departamentiniń basshysy Joenııa Vapıchana.

Ol týǵan ólkeni taný, qorǵaý jáne jaýapkershilikpen basqarýdyń qanshalyqty mańyzdy ekenin eske salady.

Byltyr Brazılııada álemdegi eń qart áıel 116 jasynda qaıtys boldy. Brazılııalyq monah áıel Ina Kanabarro Lýkas qaıtys bolǵannan keıin álemdegi eń qart áıel tıtýly ótken tamyzda 115 jasqa tolǵan Anglııanyń Sýrreı qalasynda turatyn Etel Keıteremge berildi.