Joǵalǵan tikushaq: izdestirý jumystary qashan aıaqtalady

ASTANA. KAZINFORM — Josparly ushyp ótý kezinde joǵalǵan EC-145 tikushaǵyn anyqtaý maqsatynda Sorbulaq sý qoımasy aýdanynda izdestirý jumystary jalǵasyp jatyr. Bul týraly QR Tótenshe jaǵdaılar vıtse-mınıstri Kegen Tursynbaev málim etti.

— Qarýly kúshterdiń tikushaǵy joǵalǵany týraly aqparat túsken sátten bastap Almaty qalasynan bizdiń (TJM-niń) eki tikushaq izdestirý jumystaryna jumyldyryldy… Sonymen qatar sol jerdegi aýmaqty sholyp shyqtyq jáne tikushaqqa tıesili bolýy múmkin bólshekter tabyldy. Qazir Sorbulaqta izdestirý jalǵasyp jatyr. Birinshiden, osy jumystardy negizinen Qorǵanys mınıstrligi atqaryp otyr, sondaı-aq bizdiń qurylymdar da sol jerge tartyldy. 1-2 kún ishinde ony tabady dep senemiz, — dedi K. Tursynbaev Ortalyq kommýnıkatsııalar qyzmetindegi baspasóz máslıhatynda.

Eske salsaq, 25 shildede Almaty oblysynda josparly ushý barysynda Qazaqstan Respýblıkasy Qarýly Kúshteri Áýe qorǵanysy kúshteriniń EC-145 tikushaǵy radardan joǵalyp ketti. 

26 shildede TJM qutqarýshylary joǵalǵan tikushaqtyń bólshekterin tapty. 

Josparly ushyp ótý kezinde joǵalǵan Áýe qorǵanysy kúshteriniń EC-145 tikushaǵynda bolǵan adamdardyń ornyn anyqtaý maqsatynda Sorbulaq sý qoımasy aýdanynda aýqymdy izdestirý-qutqarý operatsııasy táýlik boıy jáne kúsheıtilgen rejımde júrgizilip jatyr.