Joǵalǵan sportshy qyzben birge bolǵan jas jigit quzdan qulap mert boldy
ALMATY. QazAqparat - Almatyda ózin izdegenderden qashyp quzdan qulap ketken sportshy qyzben birge bolǵan jas jigit mert boldy, dep habarlaıdy QazAqparat tilshisi.
«Jas jigittiń múrdesi tabyldy. Múrdede kúshtep óltirýdiń belgileri bilinbeıdi. Faktige qatysty sot-medıtsınalyq saraptama taǵaıyndaldy. Sonymen qatar, onyń kúdikti retinde izdeýde bolǵany anyqtaldy. Ol óziniń týysqandarynyń birin pyshaqtap, iri somadaǵy aqshasyn alyp ketken», - deıdi Almaty qalalyq ІІD resmı ókili Saltanat Ázirbek.
Aıta keteıik, osydan birneshe kún buryn izdeý jarııalanǵan sportshy qyz Anastasııa Smırnovanyń Medeý shatqalynan Nazar esimdi jigitpen tabylǵany habarlanǵan edi. Alaıda, izdeýge kómektesken eriktilerden qashamyz dep Anastasııa men Nazar quzdan qulap ketken bolatyn. Islam Ýgýshev esimdi volonter Feısbýk áleýmettik jelisinde Nazardyń shatqaldan qulap, mert bolǵanyn habarlady.
Eske sala keteıik, buǵan deıin Almaty dárigerleri ózin izdegenderden qashyp quzdan ushyp ketken sportshy qyzdyń hal-jaǵdaıy týraly aıtyp bergen. Sportshy qyz Anastasııa Smırnova Jedel medıtsınalyq kómek kórsetý aýrýhanasyna jetkizilgen.
«Boıjetkenniń tize tusynyń jumsaq tinderi, kókirek qýysy zaqymdalǵan. Aýrýhananyń qabyldaý bólimshesinde qajetti mamandar kómek kórsetti. Tekserý júrgizildi. Densaýlyǵyna qaýip týyp turǵan joq», - degen bolatyn qalalyq Densaýlyq saqtaý basqarmasy.
