Joǵalǵan oqýshy Astanadan tabyldy
TALDYQORǴAN.QazAqparat - 31 naýryzdan beri habar-osharsyz ketken oqýshy tabyldy. Taldyqorǵandyq turǵyndy polıtseıler Astanadan tapty, dep habarlaıdy QazAqparat tilshisi.
17 jastaǵy jetkinshek osymen birneshe mərte úıinen qashyp ketken. Tərtip saqshylary 2016 jyly ony Astana qalasynan tapqan edi. Bul joly da polıtseılerdiń elordalyq əriptesteri balany izdestirýge kómektesti.
"Qazir jetkinshek Astanadaǵy jasóspirimderge arnalǵan ońaltý ortalyǵyna jetkizildi. Balanyń jaǵdaıy jaqsy. Qazir ol ata-anasyn kútip otyr. Olar balany alyp ketedi",-dedi oblystyq ІІD baspasóz qyzmetindegiler.
Anyqtalǵandaı, jasóspirim Astanaǵa baǵyt alǵan kólikti toqtatyp, sol arqyly jetken. Al onyń joǵalǵandyǵy jóninde 3 səýir kúni Taldyqorǵandaǵy Іshki ister basqarmasyna anasy habar bergen.
