Joǵalǵan qyzylordalyq azamat bir aıdan keıin tabyldy
QYZYLORDA. QazAqparat - Bir aıdan astam ýaqyt boıy habarsyz ketken qyzylordalyq azamat Bashqurtstannan aman-esen tabyldy, dep habarlaıdy QazAqparat tilshisi.
Jergilikti turǵyn Qyzylorda qalalyq polıtsııa basqarmasynyń kezekshi bólimine inisinen 10 aqpannan beri habarsyz qalǵanyn aıtyp aryz túsirdi. Іnisi avtokólik alý maqsatynda Bashqurstan astanasy -Ýfa qalasyna attanyp ketken. Sodan beri eshbir habar bermegen.
Jergilikti polıtsııa qyzmetkerleri dereý iske kirisip, týysqany usynǵan sýretke sáıkes izdeý júrgizdi.
«Jedel izdestirý is-sharalaryn tez arada júrgizý qajettiligi týyndady. Bashqurstan ishki ister mınıstrliginiń resmı saıtyna ótinim jiberildi. Bul izdestirý sharalaryn jedeldetýge múmkindik týǵyzdy. Nátıjesinde bir aıdan astam ýaqyt boıy habarsyz ketken qyzylordalyq úıine aman-esen oraldy», - dep málim etti Qyzylorda oblystyq polıtsııa departamentiniń baspasóz qyzmeti.
