Joǵalǵan tsezııdi tasymaldaǵan kólikti shyǵarýshy zaýytqa talap-aryz jiberildi - QR EM

ASTANA. QazAqparat - Mańǵystaý oblysynda radıoaktıvti tsezııi bar konteınerdiń joǵalýy faktisi boıynsha qaýipti júkti tasymaldaǵan júk kóligin shyǵarýshy zaýytqa talap-aryz jiberildi. Bul týraly búgin Ortalyq kommýnıkatsııalar qyzmetindegi brıfıngte QR Energetıka mınıstrligi Atom jáne energetıkalyq baqylaý men qadaǵalaý komıteti tóraǵasynyń orynbasary Tımýr Jantıkın málim etti.

«Júk kóliginde tireýishteri shyǵyp ketýinen atalǵan konteıner túsip ketken. Osy oraıda kólikti shaǵarýshy zaýytqa tıisti shaǵym usynyldy. Ózderińiz bilesizder, konteıner tabylǵan bolatyn»,-dedi T. Jantıkın. Osy sekildi oqıǵalar álemde budan buryn bolǵandyǵyn aıta kele ol: «ózge elderde júkti joǵaltý oqıǵalary oryn alyp jatady, alaıda olardyń tabylýy ekitalaı. Juma kúni bizde radıoaktıvti zattar men sáýlelerdi ıondaýshylardy tasymaldaý úshin tórt mamandandyrylǵan kólik tapsyryldy. Bul kólikter Ulybrıtanııa men AQSh-tan alyndy. Kólikterdi tabystaý rásiminde Qazaqstanda radıoaktıvti materıaldarǵa qatysty qadaǵalaý joǵary deńgeıde ekeni atap ótildi. Óıtkeni, joǵalǵan konteıner elimizde tez arada tabyldy»,-dedi ol. Esterińizge sala keteıik, tamyzdyń aıaǵynda tsezıı-137 salynǵan konteıner Oraldan Aqtaýǵa tasymaldaý kezinde Saı-Ótes pen Shetpe aralyǵyndaǵy jolda joǵalǵan. Atalǵan fakti boıynsha qylmystyq is qozǵaldy. Qyrkúıektiń 5-inen 6-syna qaraǵan túni Qyzylorda qalasynyń turǵyny belgisiz azamattyń «KamAZ» júk kóligimen Mańǵystaý oblysynda joǵalǵan tsezııdi alyp bara jatqandyǵyn habarlady. Habar túsken sátten bastap, Qyzylorda jáne oǵan jaqyn oblystardyń jeke quramalaryna kólikti ustaý týraly nusqaý berildi. Polıtsııanyń jedel jumystary nátıjesinde túngi saǵat ekide Qyzylorda oblysynyń Shıeli aýdanyna qarasty Báıgequm aýylyna kireberis burylysta «KamAZ» júk kóligi júrgizýshisimen jáne jolaýshysymen ustaldy, kólikten joǵalǵan kapsýla tabyldy.