Joǵalǵan avstralııalyq balyqshynyń súıegi qoltyraýynnyń ishinen tabyldy
ASTANA. QazAqparat – Balyq aýlaý kezinde joǵalyp ketken Avstralııa turǵynynyń súıegi qoltyraýynnyń asqazanynan tabyldy, dep habarlaıdy QazAqparat BBC-ge silteme jasap.
65 jastaǵy Kevın Darmodıdi sońǵy ret senbi kúni Kvınslendtiń soltústigindegi qoltyraýyndar mekendeıtin Kennedı-Bendte kórgen. Eki kún izdestirý jumystaryn júrgizgen polıtsııa osy ólkedegi eki úlken qoltyraýyndy uıyqtatý sheshimin qabyldaǵan. Solaı olardyń ishinen adam súıekterin tapqan.
Tabylǵan deneni týystarynyń taný sharasy ótkizilmegen. Degenmen, polıtsııa er adamdy tabý jumystary «qaıǵyly aıaqtalǵany» týraly málimdeme jasady.
Kevın Darmodı tájirıbeli balyqshy jáne Keıp-Iork qaýymdastyǵynyń kórnekti múshesi bolǵan. Uzyndyǵy 4,1 m jáne 2,8 m bolǵan eki qoltyraýyn dúısenbide Darmodıdi adamdar sońǵy ret kórgen jerden 1,5 shaqyrym jerde atyldy.
Adam súıegi baýyrymen jorǵalaýshylardyń bireýiniń ishinen ǵana tabyldy, biraq jabaıy tabıǵatty qorǵaý qyzmetkerleri oqıǵaǵa eki jyrtqyshtyń da qatysy baryn aıtýda. Sol kúni K.Darmodıdiń qasynda bolǵan basqa balyqshylardyń sózinshe, olar shabýyl sátin kórmegen, biraq onyń aıqaıy men sýdyń qatty shashyraǵan daýysyn estigen.
Qoltyraýyndar Avstralııanyń tropıkalyq soltústik bóliginde jıi kezdesedi, biraq adamdarǵa shabýyldaýy sırek bolǵan edi. Darmodıdiń ólimi 1985 jyly jazbalar júrgizile bastalǵannan beri Kvınslendtegi ólimge ákelgen 13-shi shabýyl.
