Joǵalǵan almatylyq kelinshektiń SIM-kartasy Reseıde bolyp shyqty
ALMATY. QazAqparat - Almatyda eriktiler men polıtsııa 28 jastaǵy eki balanyń anasyn izdestirip jatyr. Olga Gorodetskaıanyń SIM-kartasy Reseı Federatsııasynyń aýmaǵynda ekendigi anyqtaldy, dep habarlaıdy QazAqparat tilshisi.
«Qoǵam qaýipsizdigi kúzeti» eriktiler uıymynyń basshysy Islam Ýgýshev 14 kún ishinde qandaı jumys atqarylǵanyn aıtty.
«14 kún ishinde kelinshekti izdeýge 10 erikti qatysty. 30 almatylyq azamat, basqa óńirlerdegi 50 azamat óz erikterimen izdeý sharalaryna atsalysty. Almatyda Olgaǵa syrt kelbeti uqsas 100 adam tekserildi. Barlyq qoǵamdyq oryndar qaraldy», - dedi Islam Ýgýshev.
Onyń aıtýynsha, Olganyń telefony boıynsha sońǵy ret Reseı terrıtorııasynda bolǵany anyqtalǵan.
«Telefon kartalary Reseıde ekeni anyqtaldy. Biraq Olga Qazaqstannan shyqpaǵan. Bul da qujat arqyly rastaldy», - dedi I.Ýgýshev.
Kelinshektiń artynda 5 jáne 3 jastaǵy búldirshinderi qalǵan. Jaqyndary 28 jastaǵy Olganyń balalaryn tastap, sonsha uzaqqa ketýi múmkin emes deıdi.
Olga Gorodetskaıa 4 qazanda jumysqa ketken. Sol kúni keshke 19:00-de baılanysqa shyqqan.
Sonymen qatar qaladaǵy kameralar arqyly Olga Seıfýllın Mámetova kósheleri qıylysyndaǵy Mega saýda úıine aralaǵany belgili boldy. Saýda ornynan shyqqan soń kelinshek Baıtursynov kóshesine qaraı baǵyt alǵan. Sodan iz-túzsiz joǵaldy.
