Jobalyq qarjylandyrý mámilelerin qamtıtyn zań qabyldandy - Senat
ASTANA. 21 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine jobalyq qarjylandyrý máseleleri boıynsha ózgerister men tolyqtyrýlar engizý týraly» QR Zań jobasyn ekinshi oqylymda talqylanyp, qujat qabyldandy.
Atalǵan zań jobasy jobalyq qarjylandyrý mámilelerin júzege asyrý úshin zańnamalyq baza jasaý maqsatynda ázirlengen. Bul rette jobalyq qarjylandyrý mámileleri jekemenshik kapıtaldy tarta otyryp iri jobalardy, sondaı-aq memleket qatysatyn jekelegen jobalardy iske asyrý úshin júzege asyrylatyn bolady. Osyǵan oraı Zań jobasy men 12 zańnamalyq aktige, onyń ishinde 4 Kodekske ózgerister men tolyqtyrýlar engiziledi. Atap aıtqanda, Zań jobasynda jobalyq qarjylandyrý mámileleri úshin qurylatyn arnaıy qarjy kompanııalary qyzmetiniń, jobalyq qarjylandyrý kezinde talap etý qúqyqtaryn berýdiń erekshelikterin retteıtin erejeler kózdeledi. Sondaı-aq kredıtorlardyń, joba oryndaýshysynyń jáne tapsyrys berýshiniń quqyqtary qamtylady. Budan bólek, qujatta memleket qatysatyn jobalyq qarjylandyrý tetikteri aıqyndalady. Onda bazalyq shartta aıqyndalǵan aıtarlyqtaı talaptardy buzǵan jaǵdaıda jobanyń oryndaýshysyn aýystyrý tártibi qarastyrylady. Jobalyq qarjylandyrý kezinde oblıgatsııalar shyǵarý erekshelikteri de kózdeledi.
Ekinshi oqylym barysynda senatorlar qujatqa «bazalyq shart», «bólinbegen aktıvter», «jobalyq qarjylandyrý», «tapsyrys berýshi» degen uǵymdardy naqtylaýdy kózdeıtin ózgerister engizdi. Endi qujat Memleket basshysynyń qol qoıýyna jiberiledi.
