Jobalyq-smetalyq qujatty túzeý bıýdjetke salmaq túsirip otyr — senator

ASTANA. KAZINFORM — Senat depýtaty Bekbol Orynbasarov jobalyq-smetalyq qujatty qaıtalama túzetýlerden bas tartyp, bıýdjet qarajatyn únemdeý máselesin kóterdi.

Senator Bekbol Orynbasarov Premer-mınıstr Oljas Bektenovke depýtattyq saýal joldap, bıýdjet qarajaty esebinen salynyp jatqan nysandarǵa arnalǵan jobalyq-smetalyq qujatty qoldanylý merzimine qatysty normalardy qaıta qaraýdy usyndy.

— Qazaqstan Respýblıkasynyń zańnamasynda belgilengen tártippen bekitilgennen keıin úsh jáne odan da kóp jyl ishinde qurylys bastalmaǵan jobalaý-smetalyq qujattama eskirgen bolyp esepteledi, — dedi depýtat.

Onyń aıtýynsha, búginde jobalyq-smetalyq qujatty túzetý jergilikti atqarýshy organdarǵa aıtarlyqtaı qarjylyq salmaq túsirip otyr.

Depýtat keltirgen málimetke súıensek, Mańǵystaý oblysynda mádenıet pen sport salasyndaǵy jalpy quny 14,5 mlrd teńge bolatyn 12 jobaǵa túzetý engizý úshin qosymsha 4,5 mlrd teńge qajet. Al quny 45,8 mlrd teńge bolatyn 35 jol jobasyna taǵy 13,7 mlrd teńge talap etiledi.

— Jergilikti atqarýshy organdardyń bıýdjetine qosymsha júktemeni boldyrmaý úshin jobalardy qaraý merzimin uzartý nemese jobalaý-smetalyq qujattamanyń smetalyq bóligin ol bekitilgennen keıin eki jyl ishinde ózekti etý qajet, — deıdi Bekbol Orynbasarov.

Eske salaıyq, qurylys kompanııalary jobalyq-smetalyq qujattan aýytqysa, úleskerlerge aqsha aıyrmasyn qaıtarady.