Jobalyq keńse otyrysynda Alataý qalasyn damytý máselesi talqylandy

ASTANA. KAZINFORM - Vıtse-premer Qanat Bozymbaevtyń tóraǵalyǵymen Alataýdy damytý máseleleri jónindegi jobalyq keńseniń ekinshi otyrysy ótti.

Qatysýshylar «Alataý qalasynyń erekshe mártebesi týraly» zańdy ázirleý jáne arnaıy ekonomıkalyq aımaqtar boıynsha zańnamany qaıta qaraý jónindegi sharalardy talqylady. Buǵan deıin Qanat Bozymbaev Qytaıdyń SDI damý ınstıtýtynyń ókilderimen kelissózder júrgizip, olar osy baǵytta kómektesýge daıyn ekendikterin bildirdi.

Vıtse-premer jańa qalany salý kezinde tek halyqaralyq standarttarǵa ǵana emes, sonymen qatar óz tájirıbemizge de súıený qajet ekenin atap ótti.

«Bizde jańa astanany salý tájirıbesi bar. Sońǵy jyldary jańa oblys ortalyǵy – Túrkistan qalasy boı kóterdi. Bul tájirıbe Alataý qalasyna da paıdaly bolýy múmkin. Almaty oblysynyń ákimdigine Túrkistan qalasynyń qurylys tájirıbesin jan-jaqty qarastyrýdy tapsyramyn», — dedi Qanat Bozymbaev.

Sondaı-aq saıajaı massıvterin turǵyn úıdi jańartý baǵdarlamasyna uqsas zamanaýı turǵyn úı keshenderine aýystyrý múmkindigi qarastyrylyp jatyr. Sheteldik mamandar úshin, onyń ishinde Digital Nomad Visa úlgisi boıynsha jeńildetilgen vızalyq rejım máselesi pysyqtalýda. Qurylys kompanııalarymen EPC-kelisimsharttar jasasýmen kásipkerlik qyzmetti júzege asyratyn Alatay AEA qatysýshylary úshin salyq preferentsııalaryn kózdeý usynyldy.

Alataý jáne Almaty qalalary arasynda Urban Air Mobility (UAM) áýe kóligi úshin synaq jasaý ortasyn jáne jumys tobyn qurý josparlanýda. Aeromobılder jolaýshylar men júkterdi tasymaldaý úshin paıdalanylatyn bolady.

Mańyzdy máselelerdiń biri jańa qalada áleýmettik qyzmetkerlerdiń jalaqysyn saqtaý boldy. Qanat Bozymbaev ádilet, eńbek jáne halyqty áleýmettik qorǵaý mınıstrlikterine tıisti sharalardy ázirleýdi tapsyrdy.