Jobalaý-smetalyq qujattamany maquldaý kezinde asa iri mólsherde para alǵan sheneýnik ustaldy

ASTANA. KAZINFORM — Almaty qalasyndaǵy aýrýhanalarda, mektepterde jáne basqa da áleýmettik mańyzy bar obektilerde qazandyqtardy qaıta jańartý boıynsha jobalaý-smetalyq qujattamaǵa oń qorytyndylar berý kezinde asa iri mólsherde para alý faktisi anyqtaldy. Bul týraly Sybaılas jemqorlyqqa qarsy is-qımyl agenttiginiń baspasóz qyzmeti málim etti. 

«Aǵymdaǵy jyldyń 27 qazanynda buryn kelisilgen 73,5 mln teńgeden 12,2 mln teńge somasynda paranyń bir bóligin alǵannan keıin Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń Soltústik óńiri boıynsha „Jobalardyń memlekettik vedomstvodan tys saraptamasy“ ShJQ RMK fılıalynyń dırektory áshkerelendi», — delingen agenttik habarlamasynda.

Paranyń bir bóligin bergen sheneýnik pen kompanııanyń quryltaıshysy sottyń sanktsııasymen qamaýǵa alyndy.

Tergeý jalǵasyp jatyr.  

Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy.

Eske sala keteıik, sondaı-aq Shymkentte para almaq bolǵan sanıtarlyq qadaǵalaý salasyna jaýapty basshylar sottaldy.

Bıyl avtomobıl joly salasynda 24 qylmystyq is tirkelgen.