Jobalaý-smetalyq qujattama salasynda monopolııaǵa qarsy baqylaý keńeıtile me – Úkimet basshysynyń jaýaby

ASTANA. KAZINFORM – Premer-Mınıstr Oljas Bektenov Májilis depýtattarynyń jobalaý-smetalyq qujattama salasynda monopolııaǵa qarsy baqylaýdy keńeıtýge qatysty saýalyna jaýap berdi. 

– «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» Zańnyń 32-babyna sáıkes sáýlet, qala qurylysy jáne qurylys salasyndaǵy jekelegen qyzmet túrleri Qazaqstan Respýblıkasynyń «Ruqsattar jáne habarlamalar» týraly zańnamasyna sáıkes lıtsenzııalanady. Jobalaý-smetalyq qujattamany jobalaý qyzmetiniń tıisti túrlerine lıtsenzııasy bar jeke jáne zańdy tulǵalar ázirleıdi. Búgingi tańda el boıynsha jobalyq qyzmetti 15,9 myń jobalyq uıym júzege asyrady. Onyń ishinde 1-sanatty - 1,9 myńǵa jýyq, 2-sanatty - 4 myńǵa jýyq, 3-sanatty - 10 myńǵa jýyq uıym, - dedi Úkimet basshysy jaýabynda.

Onyń paıymynsha, mundaı kórsetkishter básekelestik naryǵy damyǵanyn aıǵaqtaıdy.

– Qoldanystaǵy zańnamaǵa sáıkes jobalaý-smetalyq qujattama ázirleý azamattyq-quqyqtyq qatynastar aıasynda tapsyrys berýshi men oryndaýshy arasyndaǵy tıisti shart negizinde júzege asyrylady. Óz kezeginde memlekettik ınvestıtsııalar esebinen qarjylandyrylatyn jobalaý-smetalyq qujattamany ázirleý «Memlekettik satyp alý týraly» Zańǵa sáıkes konkýrstyq rásimderdi ótkizý tásilimen aıqyndalady. Osylaısha, osy saladaǵy monopolııaǵa qarsy baqylaýdy keńeıtý múmkin emes dep sanaımyz, - dedi Oljas Bektenov.

Aıta keteıik, elimizde Superpave tehnologııasy boıynsha jol jamylǵylaryn jobalaýdyń halyqaralyq standarttary engizilmek.