Jobalardy saraptama qyzmeti jeke naryqqa beriledi - QR UEM

ASTANA. QazAqparat - QR Ulttyq ekonomıka mınıstrligi «100 naqty qadam» Ult Josparynyń 47 qadamy aıasynda saraptamalyq qyzmetti básekelik ortaǵa berý boıynsha jumystardyń josparyn ázirledi.

«Qazaqstan Respýblıkasynda bıznes-ortany túbegeıli jaqsartý jónindegi Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» Zańmen jáne Memleket basshysynyń 5 ınstıtýtsıonaldy reformalaryn júzege asyrýdyń «100 naqty qadamynyń» 47 qadamy boıynsha, 2020 jylǵa deıin saraptama qyzmetiniń 90 paıyzyn jeke naryqqa berý josparlanýda.

Básekelestik ortaǵa sarapshy qyzmetin berý boıynsha is-sharalar josparyna sáıkes , Ulttyq ekonomıka mınıstrligi jeke naryqqa berilýi tıis saraptama salasyndaǵy jumys kólemin anyqtaý boıynsha arnaıy jumys tobyn qurdy. Onyń quramynda - «Atameken» Ulttyq kásipkerler palatasynyń, Qazaqstan qurylysshylary qaýymdastyǵy men Qazaqstannyń qurylys salasynyń ulttyq qaýymdastyǵynyń ókilderi enip otyr.

Mınıstrlikke qarasty «Memsaraptama» memlekettik mekemesiniń dırektory Asqar Smanqulovtyń túsindirýi boıynsha, jyl saıyn básekelestik ortaǵa jobalardyń 10% deıingi kólemi ótip otyrmaq, osylaısha 2020 jylǵa deıin saraptama qyzmetiniń 90 paıyzy ótetin bolady.

Aıta ketý kerek, 2016 jyly saraptama qyzmetiniń 50 paıyzy jeke naryqqa ótti.

Onyń ishinde jańa ǵımarattardy salýǵa, qaıta jańartýǵa jáne kúrdeli jóndeý qurylysy úshin beriletin jobalyq-smetalyq qujattamanyń (JSQ TEN) tehnıkalyq-ekonomıkalyq negizdemesi, eldi meken aýmaǵynda abattandyrý jumystaryn júrgizý jóninde tehnıkalyq-ekonomıkalyq negizdemesi, tehnologııalyq turǵyda jeńil keıbir ınjenerlik ınfraqurylymdardyń nysandary kiredi.

QR Ulttyq ekonomıka mınıstrligi baspasóz qyzmetiniń habarlaýynsha, 2017 jyly jeke naryqqa saraptamanyń 70 paıyzy ótedi.

Onyń ishinde 10 kVt-qa deıingi elektr qýatyn taratý júıelerin salý, qaıta jańartý jáne kúrdeli jóndeýden ótkizýge, qala aýdandarynyń ishinde sý qubyry men káriz júıelerin salýǵa qajetti sarapatamalyq qyzmetter jatady.

2018 jyldyń 1 qańtarynan bastap, 2019 jyldyń 1 qańtaryna deıin saraptama qyzmetiniń 80 paıyzy jeke sektorda bolady.

Onyń ishinde 35 kVt-qa deıingi elektrqýatyn taratý júıelerin salý, qaıta jańartý jáne kúrdeli jóndeýden ótkizýge, IV jáne V sanattaǵy kólik joldaryn, sonymen birge temir jol jáne ishki baılanystyratyn joldar salýǵa qatysty tehnıkalyq-ekonomıkalyq negizdeme berilmek.

Memlekettik saraptamanyń enshisinde tek tehnologııalyq kúrdeli ǵımarattar men qurylystar kiretin bolady. Olar: memleketaralyq mańyzǵa ıe qurylys jobalary, arnaıy tehnıkalyq sharttary bar sırek jobalar, tehnologııalyq kúrdeli ǵımarattar men qurylystar.