Jobadan keıin tanymaldyǵym artty - ózbekstandyq ánshi Silk Way Star jaıly
ASTANA. KAZINFORM – Astanada Azııadaǵy alǵashqy iri vokaldyq megajoba – Silk Way Star-dyń jartylaı fınaly aıaqtaldy. Jeti úzdiktiń qatarynda Ózbekstannan kelgen ánshi Madınaboný Adylova bar. Ol Jibek Joly arnasynyń «Búgin LIVE» baǵdarlamasynda joba jaıly áserimen bólisti.
Madınabonýdyń aıtýynsha, jartylaı fınalǵa deıingi jol óte aýyr bolǵan.
– Joba ıntrıga, jaýapkershilik pen tolqýǵa toly. Ár kezeńnen súrinbeı ótýińniń ózi tájirıbe. Sońǵy epızod aldyndaǵy shyǵarylym eń kúrdeli kezeń boldy der edim. Biz qazaqstandyq ánshilermen birge shyrqadyq. Nazarbektiń 2 jyl buryn fanaty bolǵan edim, ánderin tyńdap júrdim. Bul kezeńde birge án aıtý buıyrdy. Onyń stıli unaıdy, sebebi bul ózgeshe stıl Ózbekstanda endi damyp jatyr, – dedi ánshi.
Ónerpaz jartylaı fınal aldynda «Ne boldi» ánin tańdaýynyń sebebin túsindirdi.
– Ándi redaktorlarmen birge tańdadyq. Óıtkeni kóbine lırıkalyq, muńdy ánderge jaqynmyn. Jańashyldyq engizeıik dep sheshtik. Onyń ústine bul án TMD elderinde tanymal. Aýdıtorııany jandyrýǵa da sep boldy, – deıdi Madınaboný Adylova.
Ánshi jobada básekelestiktiń joǵary deńgeıde ekenin aıtady.
– Jobada bárimiz bir-birimizge tileýlespiz. Alaıda armenııalyq Saro Gevorgıandy básekelesim der edim. Ol óte talantty, – dedi ol.
Silk Way Star-dyń áserli tustary da ónerpaz esinde erekshe qalǵan.
– Buǵan deıin 6-kezeńde sońǵy 2 jylda tanymal bolǵan ánderdi aıttyq. Men Ledı Gaganyń shyǵarmashylyǵyn tańdadym. Emotsııamdy jeńe almaı, jyladym. Sebebi bul ándi marqum atammen baılanystyryp, án aıtyp jatqanymda kóńilim túsip ketti. Jalpy, jobada 11 elden kelgen dostardy, áriptesterdi taptyq. Halyqaralyq konkýrsta tájirıbe alyp jatyrmyz. Jobanyń arqasynda meniń Qazaqstanda, Ózbekstanda tanymaldyǵym artty. Jelide oqyrmandarym kóbeıdi, – dedi ánshi.
Aıta keteıik, Silk Way Star jobasynyń fınaldyq epızody 22 qarashada saǵat 20:00-de Jibek Joly telearnasynda tikeleı efırde kórsetiledi.
