JІÓ-niń ósimi qazaqstandyqtardyń ómir sapasyna qalaı áser etip jatyr

ASTANA. KAZINFORM — 2025 jyldyń alǵashqy jeti aıynda Qazaqstan ekonomıkasy 6,3%-ǵa ósti. Biraq bul ósimniń basty qundylyǵy – adamdardyń kúndelikti ómirine áser etýinde. Elde tabys deńgeıi, mobıldik, tutyný mádenıeti men ómir sapasy artyp keledi. Ekonomıkalyq damý endi tek kórsetkishtermen emes, azamattardyń shynaıy múmkindikterimen ólshenip otyr.  

Tengenomika telegram-kanalynyń jazýynsha, ekonomıkadaǵy alǵa jyljý halyqtyń ómirinde naqty kórinis taýyp keledi: saıahattaý, turǵyn úı alý, sapaly azyq-túlikke qol jetkizý jáne zamanaýı ınfraqurylym ıgilikteri keńeıip keledi.

Halyq múddesine baǵyttalǵan ekonomıka

Qazaqstannyń JІÓ ósimi – 6,3%. Bul – senimdi kórsetkish. Biraq makroekonomıkalyq sandardyń mańyzy olardyń adamdardyń ómirine qalaı áser etetinimen ólshenedi.

Sońǵy jyldary Qazaqstan halqy anaǵurlym belsendi jáne mobıldi bola tústi.

• Іshki týrızm shamamen 40%-ǵa ósip, 6,6 mıllıonnan 10,5 mıllıon adamǵa jetti.
• Shetelge shyqqan qazaqstandyqtardyń sany úsh esege artyp, 1,19 mıllıon adam boldy.
• Tasymal kólemi de ulǵaıyp keledi: áýe qatynasy arqyly 14,4 mıllıon jolaýshy tasymaldandy, al taksı qyzmetine suranys 35%-ǵa artty.
• 2018 jyly taksı qyzmetimen 54,3 mln jolaýshy tasymaldansa, 2024 jyly bul kórsetkish 73,3 mln adamǵa jetti.
• Jyljymaıtyn múlik ıeleri sany 2020 jylǵy 3 854 000-nan 2024 jyly 4 983 200-ge deıin ósti. Demek, sońǵy bes jylda 1 129 000 adam óz baspanasyn satyp alǵan.

Bul qazaqstandyqtardyń tabysy men qarjylyq erkindiginiń artqanyn kórsetedi – adamdar jıi saıahattaı alady jáne tabystaryn óz qalaýynsha paıdalana bastady.

Kúndelikti daǵdylar da ózgere bastady.

• Qazaqstandyqtar sapalyraq tamaqtanady – et pen jemis-jıdek tutyný kólemi artyp keledi.
• Áleýmettik osal toptar úshin azyq-túlik sebeti keńeıtilip, burynǵy 20 ataýdan 43 túrli ónimge deıin tolyqtyryldy. Bul – halyqtyń osal bóliginiń qaýipsizdigin kúsheıtýdiń jáne azyq-túlik turaqtylyǵyn arttyrýdyń mańyzdy qadamy.

Qalalyq orta da jańaryp keledi: gaz júrgizý, jaryqtandyrý, aýlalardy abattandyrý, joldardy jóndeý qarqyn alýda. Bul ásirese uzaq jyldar boıy mundaı ıgilikterge qol jetkize almaǵan aımaqtarda aıqyn seziledi. Munyń barlyǵy – jaı ǵana ınfraqurylym emes, jańa ómir sapasynyń negizi.

JІÓ ósimi – mańyzdy kórsetkish. Alaıda búginde basty nazar sapalyq ósimge aýdarylýy tıis: ol – otbasylardyń ál-aýqaty, qyzmetterdiń deńgeıi, bilim alý men kásipkerlik múmkindikteri, sondaı-aq ınfraqurylymǵa qoljetimdilik arqyly kórinis tabady.

Ekonomıka tek kólem jaǵynan emes, adamǵa, onyń kúndelikti qajettilikteri men múmkindikterine jaqyn bolýy kerek.

Ekonomıkalyq ósim qazirdiń ózinde adamdardyń kúndelikti ómirinde baıqalýda – kólik, ınfraqurylym jáne tutyný salalarynda. Biraq shynaıy sapaly ósim – bul tek sandar emes, turaqty jumys, bilim alý jáne negizgi qyzmetterge qoljetimdilik úshin jasalǵan berik jaǵdaılar. Qazirgi nátıjeler barlyq óńirde birdeı emes, sondyqtan saıasattyń basty baǵyty – osy teńgerimdi qamtamasyz etý bolýy tıis.

Premer-mınıstrdiń orynbasary — Ulttyq ekonomıka mınıstri Serik Jumanǵarın jalpy ishki ónimdi 2029 jylǵa qaraı eki ese arttyrý mindeti turǵanyn aıtqan edi.