JІÓ, ınflıatsııa, ulttyq qor, bıýdjet: Úkimettiń 2026-2028 jyldarǵa ekonomıkalyq boljamy
ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın elimizdiń 2026-2028 jyldary ekonomıkalyq damý boljamyn tanystyrdy.
— Áleýmettik-ekonomıkalyq damý boljamy bazalyq nusqa negizinde qalyptastyrylǵan. Bazalyq nusqaǵa sáıkes 2026 jyly jalpy ishki ónimniń naqty ósýi boljam boıynsha 5,4%, 3 jyldaǵy ortasha jyldyq ósim — 5,3%-dy quraıdy. Nomınaldy JІÓ 2026 jyly 183,8 trln teńgeden 2028 jyly 229,8 trln teńgege deıin ósedi. Ekonomıkanyń ósýi naqty sektor men qyzmet kórsetý salasyndaǵy ósimmen qamtamasyz etiledi. Óńdeýshi ónerkásipte ınvestıtsııalyq jobalardy iske asyrý esebinen ósý qarqynynyń 2026 jylǵy 6,2%-dan 2028 jyly 6,6%-ǵa deıin ulǵaıýy boljanady, — dedi Serik Jumanǵarın Úkimet otyrysynda.
Vıtse-premer usynǵan málimetke sáıkes, taý-ken ónerkásibindegi úsh jyldaǵy ortasha ósim 2,8%, aýyl sharýashylyǵynda — 3,9%, qurylysta — 11,0%, kólik qyzmetterinde — 10,1% jáne saýdada — 6,7%-dy quraıdy. Onyń aıtýynsha, oń saýda balansy saqtalady.
— Eksport boljam boıynsha 2026 jyly 77,1 mlrd AQSh dollarynan 2028 jyly 83,7 mlrd AQSh dollaryna deıin, ımport — 67,7-den 75,2 mlrd AQSh dollaryna deıin ósedi. Inflıatsııa boljamy 2026 jyly shamamen 10,0% aspaıdy, 2027 jáne 2028 jyldary 6,0% satysynda. Makro boljamnyń negizinde 2026–2028 jyldarǵa arnalǵan bıýdjettik parametrlerdiń boljamy qalyptastyryldy. Respýblıkalyq bıýdjettiń kirisi boljam boıynsha 2026 jyly 19,2 trln teńgeni, 2027 jyly — 21,2 trln teńgeni, 2028 jyly 23,2 trln teńgeni quraıdy, — deıdi ol.
Sondaı-aq mınıstr Ulttyq qordan kepildendirilgen transfert bıýdjet qaǵıdasyn eskere otyryp, jyl saıyn 2 770 mlrd teńge mólsherinde aıqyndalatynyn aıtyp otyr. Al bıýdjet tapshylyǵy 2028 jyly jalpy ishki ónimge qatysty 0,9%-ǵa deıin tómendeı otyryp, 2026 jyly JІÓ-ge 2,5% deńgeıinde aıqyndaldy.
— Munaı emes tapshylyq JІÓ-ge qatysty 4,9%-dan JІÓ-ge qatysty 2,7%-ǵa deıin qysqarady. Osyny eskere otyryp, respýblıkalyq bıýdjettiń shyǵysy 2026 jyly 27,7 trln teńgeni, 2027 jyly — 28,8 trln teńgeni jáne 2028 jyly — 29,8 trln teńgeni quraıdy. Kiris pen shyǵys boıynsha bıýdjet nysanaly transfert túrinde Ulttyq qordan qosymsha qarajat tartýdyń qajettiliginsiz ózin-ózi qamtamasyz etedi. Ulttyq qordyń taza valıýtalyq aktıvi 2026 jyly 60,8 mlrd dollardan 2028 jyly 68,6 mlrd dollarǵa deıin ósedi dep boljanyp otyr, — dep tolyqtyrdy S. Jumanǵarın.
Búgin Úkimet eldiń úsh jyldyq áleýmettik-ekonomıkalyq damý boljamyn pysyqtap jatyr.