ІJÓ-de kólik salasynyń úlesi 2026 jyldyń sońynda 9% jetýi tıis – mınıstr
2026 jyldyń sońynda ishki jalpy ónimdegi kólik salasynyń úlesi 9 paıyzǵa jetýi tıis. Bul týraly Kólik mınıstri Marat Qarabaev aıtty, dep habarlaıdy Kazinform.
«Jalpy, Memleket basshysy óz Joldaýynda mınıstrlik aldyna kólik salasyn damytýǵa qatysty 12 tapsyrma júktedi. Negizgi tapsyrma – Qazaqstandy Eýropa men Azııa arasyndaǵy júk qozǵalysyn qamtamasyz etetin úlken tranzıttik habqa aınaldyrý. Al basty tapsyrma – ishki jalpy ónimdegi kólik salasynyń úlesin arttyrý. Búginde ol 6,4 paıyzdy, jalpy mánde 14 mlrd dollardy quraıdy», – dedi mınıstr BAQ ókilderine arnalǵan brıfıngte.
ıAǵnı, onyń atap ótýinshe, 2026 jyldyń qorytyndysynda kólik salasynyń ІJÓ-degi úlesi 9 paıyzǵa jetip, 34 mlrd dollaryn quraýy tıis.
«Bul iri jobalardyń júzege asyrylýy tıistigin, otandyq, sonymen qatar sheteldik eksporttyq-ımporttyq júkterdiń erkin qozǵalýyna jaǵdaı jasalýy qajettigin bildiredi», – dedi Marat Qarabaev.
Mınıstrdiń dereginshe, bıyl temir jol kóligimen júk tasymalynyń kólemi ortasha eseppen 3,5 paıyzǵa artyp, 297 mln tonnaǵa jetetin bolady. Bul rette onyń 28 mln tonnasy Qytaımen araǵy 2 túıisý pýnkti arqyly qamtamasyz etiledi.
«2024 jáne 2025 jyldary qosymsha 20 stansalyq jol salýdy josparlap otyrmyz. Bul stansalar atalǵan 2 túıisý pýnkti arqyly 14 mln tonna júk tasymaldaýǵa múmkindik beredi. Qytaı tarapynan qýatty arttyrýǵa baılanysty jumystar aıaqtalǵannan keıin ony kólemi taǵy da 14 mln tonnaǵa ulǵaıatyn bolady», – dedi ol.
