«JQJK 2020» baǵdarlamasyn júzege asyrýǵa bıyl 63 mlrd. teńge bólinedi

ASTANA. QazAqparat - «JQJK 2020» baǵdarlamasyn júzege asyrýǵa bıyl 63 mlrd. teńge kóleminde qosymsha qarajat bólinedi. Bul týraly QR Densaýlyq saqtaý jáne áleýmettik damý mınıstrliginiń keńeıtilgen alqa otyrysynda mınıstrlik basshysy Tamara Dúısenova málimdedi.

Vedomstvo málimetinshe, kásiporyndarda joǵary bilikti mamandardyń jumys oryndaryn saqtaý maqsatynda jumys ýaqytynyń qysqarýyna baılanysty eńbekaqynyń 2/3 bóligin ýaqytsha sýbsıdııalaý tetikteri engiziledi. Sonymen birge, kásiporyn jumys ornyn saqtaǵan jaǵdaıda, qyzmetkerlerdi, onyń ishinde jumys isteıtin jastardy jumys berýshiler tarapynan qosa qarjylandyrýmen nemese tolyq memleket esebinen oqytýdy uıymdastyrý qarastyrylady.

Qosymsha jumys oryndaryn qurý úshin «JQJK 2020» aıasynda qoldanylatyn kelesi quraldardy: ınfraqurylymdyq jobalarǵa jumysqa ornalastyrý, barlyq memlekettik, salalyq jáne óńirlik baǵdarlamalar sheńberinde iske asyrylatyn jobalardyń múmkindikterin qoldaný jáne kásipkerlikti damytý úshin shaǵyn nesıe berý kúsheıtiletin bolady.

«Jumyspen qamtý 2020 jol kartasy» baǵdarlamasynyń aıasynda jańa bastamalardy júzege asyrý maqsatynda 60 myńǵa jýyq adamdy memlekettik qoldaý sharalarymen qamtý arqyly qosymsha 63 mlrd. teńge bólý qarastyrylyp otyr», - dep habarlady Tamara Dúısenova.

Esterińizge sala keteıik, 2015 jyly baǵdarlamany júzege asyrý aıasynda 156 myńǵa jýyq azamat jumysqa ornalastyryldy, onyń ishinde turaqty jumyspen qamtylǵan adamdar sany - 142,3 myń.