JQTB-men kúrestiń bıylǵy urany - jalpyǵa birdeı qoljetimdilik jáne adam quqyǵy máselesin qamtyp otyr

Búgin Densaýlyq saqtaý mınıstrliginde «Qazaqstandaǵy AQTQ/JQTB boıynsha jaǵdaı jáne onyń aldyn alý» atty taqyrypta ótken baspasóz máslıhatynda Densaýlyq saqtaý vıtse-mınıstri Tamara Voşenkova osylaı málim etti,  dep habarlaıdy QazAqparat.

«Dúnıejúzi osymen 20 jyl boıy jeltoqsannyń 1-i kúnin JQTB-ǵa qarsy kúres retinde atap ótip keledi. Dál bir kúndi belgilep, sol boıynsha arnaıy naýqandy júrgizýdegi maqsat - AQTQ/JQTB máselelerine qoǵamnyń nazaryn aýdarý jáne bul ınfektsııanyń taralýyna baılanysty problemanyń aldyn alý, sondaı-aq qajetti áleýmettik sharalardy júzege asyrý bolyp tabylady. Bıylǵy 2009 jylǵy JQTB-ǵa qarsy naýqannyń urany: «Jalpyǵa birdeı qoljetimdilik jáne adam quqy» dep atalyp otyr. Náýbetpen kúreste bundaı urannyń tastalýy da kezdeısoq emes. Ókinishke qaraı,sońǵy jyldary AQTQ derti búkil álem boıynsha keńirek taralyp, onyń sıpaty de erekshelene bastady. Qazaqstandaǵy jaǵdaı da solaı. Soǵan baılanysty, bul ınfektsııany juqtyrǵan adamdardyń quqyn qorǵaý ózekti máselege aınalýda. Sonymen birge, bul naýqan aıasynda adamdardyń quqyn qorǵaýmen birge, AQTQ juqtyrǵandardy emdeýge, kútýge, qoldaýǵa qoljetimdilikti qamtamasyz etý, ondaı dertke shaldyqqandardy jáne osy toptardy kemsitetin zańdardy joıý sharalary qamtylatyn bolady», dedi vıtse- mınıstr. Onyń aıtýynsha, Qazaqstan 2001 jyly BUU Bas Assambleıasynyń 26-shy Arnaıy sessııasyna qatysqan 189 eldiń biri bolyp, AQTQ/JQTB-ǵa qarsy kúres isine qoldaý kórsetý týraly deklaratsııany maquldaǵan bolatyn.

Qazaqstan jyl saıyn JQTB-ǵa qarsy kúrestiń  búkildúnıejúzilik naýqanyna qatysýshy bolyp tabylady. Bul rette respýblıkanyń búkil aýmaǵynda arnaıy sharalar qabyldanyp, BAQ-ta úndeýler jarııalanady. Búgingi tańda BUU-nyń JQTB jónindegi birikken baǵdarlamasynyń derekterine sáıkes, álemde AQTQ juqtyryp ómir súrip jatqan adamdar sany 33 mln. adamdy quraıdy eken. Buǵan deıingi jaǵdaı sekildi, álem boıynsha áli de Afrıka Saharasynyń ońtústigi AQTQ-niń keń taraǵan aımaǵy bolyp otyr.  Bunda AQTQ juqtyrǵan adamdardyń 67 paıyzy turady ári JQTB-dan qaıtys bolǵandardyń 72 paıyzy osy óńirdiń adamdary eken.