JKO-nyń kópshiligi bultty kúni jasalady
ASTANA. QazAqparat - Quqyqtyq statıstıka jáne arnaıy esepke alý jónindegi komıtetiniń statıstıkalyq derekterine qaraǵanda, jaýyn-shashyn kezinde jol-kólik oqıǵalarynyń sany artyp otyr.
Bıylǵy jyldyń 6 aıynda elimizdiń joldarynda adamdardyń ólimine nemese jaraqattanýyna ákep soqqan 7 901 jol-kólik oqıǵasy tirkelgen.
JKO-nyń besten bir bóligi nemese 1419-y qolaısyz aýa-raıy jaǵdaıynda oryn alǵan (jańbyr, qar, tuman), saldarynan 154 adam qaza bolyp, 1 866-sy jaraqattandy.
Saldary aýyr JKO-lar eldegi aýa-raıynyń jaǵdaıy óte nashar kezderinde jáne joldar durys kórinbeıtin eń qolaısyz jaǵdaılar baıqalatyn jeltoqsan men sáýir aralyǵynda tirkelgen. Osy rette aýa-raıy jaǵdaıynyń nasharlaýy jaıaý júrginshilerdi qaǵyp ketý sanyn arttyrady.
Belgili bolǵandaı, joldyń nashar kórinýi, aýa-raıy (kóktaıǵaq, joldyń taıǵaqtyǵy) jaǵdaıynyń saldarynan, qańtarda 300 JKO, aqpanda - 155, naýryzda - 254, sáýirde - 324, mamyrda - 279 fakti tirkelgen.
Salystyratyn bolsaq, jaz aılarynda apattylyq tómendeıdi, maýsymda aýa-raıyna baılanysty 97 JKO boldy.
«Kópshiligi nemese 732 JKO bultty aýa-raıynda jasalǵan, onda 79 adam qaza bolyp, 921-i jaraqattanǵan, sondaı-aq 477 JKO jańbyrda (39 jáne 612), 172 - qarda (22 jáne 271) jáne 39 JKO - tumanda (15 jáne 63) oryn aldy. Osyndaı JKO eleýli úlesi (1126) eldi-mekenderde tirkeledi, 183 halyqaralyq, respýblıkalyq mańyzy bar joldarda jáne taǵy 110 - oblystyq, aýdandyq mańyzy bar joldarda jasalǵan», - dep atap ótilgen komıtet málimetinde.
Barlyq JKO-nyń úshten bir bóligi iri megapolıs Almaty qalasyna tıesili, dál osy shaharda jol apattarynyń kópshiligi qolaısyz aýa raıy saldarynan oryn alǵan. Aǵymdaǵy jyly jaraqattaný men adamdardyń mert bolýyna ákep soqqan 482 JKO tikeldi.
Apattylyqtyń eń joǵarǵy shegi táýliktiń 17 men 20 saǵaty aralyǵyna keledi, al túngi 01.00-den tańǵy 06.00-ge deıingi aralyqta tómendeıdi.
Aıta keteıik, «Memlekettik quqyqtyq statıstıka jáne arnaıy esepke alý týraly» Qazaqstan Respýblıkasynyń Zańyna sáıkes, Quqyqtyq statıstıka jáne arnaıy esepke alý jónindegi komıtet adamdardyń ólimine nemese jaraqattanýyna alyp kelgen jol-kólik oqıǵalaryn ǵana esepke alady.
