JI jumys oryndaryn qysqartpaıdy — depýtat
ASTANA. KAZINFORM — Jasandy ıntellekt memlekettik qyzmetshilerdi almastyrmaıdy. Bul týraly Májilis depýtaty Ekaterına Smyshlıaeva málimdedi.
— Jasandy ıntellekt úlken kólemdi derekterdi taldaý sııaqty analıtıkalyq mindetterdi oryndaı alady. Biraq bul jańa tehnologııalar jumys oryndaryn qysqartpaıdy, kerisinshe qosymsha qajettilik týyndatady. Máselen, salalyq agentti úıretý úshin onymen jumys isteıtin birneshe maman kerek bolady. Demek, adamdardyń eńbegi báribir suranysta qalady, — dedi depýtat.
Onyń aıtýynsha, jasandy ıntellekt tek fýnktsııalardy qaıta bóledi.
— Kúndelikti tapsyrmalardy avtomattandyrylǵan kómekshiler atqaryp, adamdardyń ýaqyty shyǵarmashylyq pen biliktilikti qajet etetin jumystarǵa kóbirek jumsalady, — dep túsindirdi Smyshlıaeva.
Depýtattyń pikirinshe, bilim berý júıesinde de azamattardyń róli ózgeredi — olar mentorlyq baǵytqa qaraı yǵysady. Al qarapaıym isterdi avtomattandyrylǵan júıeler atqarady.
— Eńbek naryǵy fýnktsıonaldy túrde qaıta qurylady. Al «qazir jumysshylardyń 50%-yn qysqartyp, olardyń ornyna jasandy ıntellekt jumys isteıdi» deý — bul jaı ǵana haıp. Jasandy ıntellekt eshqandaı jumysqa tura almaıdy. Jaýapkershilik báribir adamǵa júkteledi, — dedi depýtat.
Buǵan deıin Depýtat JI salasynda basty mindet azamattardyń quqyǵyn qorǵaý ekenin aıtqan edi.