«Jıyrmalyq toby» elderiniń qarjy mınıstrleri men ortalyq bank basshylary qarjy naryǵyndaǵy qaýip-qaterlerdi talqylady

ALMATY. QazAqparat - QR Ulttyq bankiniń tóraǵasy D. Aqyshev aǵymdaǵy jyly qyrkúıekte Qytaıda ótetin G20 Sammıtiniń qarsańynda 23-24 shildede Chendý qalasynda (QHR) ótken «Jıyrmalyq toby» elderiniń qarjy mınıstrleri men ortalyq bankteri basqarýshylarynyń kezdesýine qatysty. Qazaqstandyq delegatsııany QR Qarjy mınıstri B. Sultanov bastap bardy. Bul týraly búgin QR Ulttyq bankiniń baspasóz qyzmetinen habarlady.

Іs-sharaǵa G20 elderiniń jáne shaqyrylǵan memleketterdiń ekonomıkalyq jáne qarjy bloktary memlekettik organdarynyń basshylary, Halyqaralyq Valıýta Qory, Qarjylyq turaqtylyq keńesi, EYDU jáne Dúnıejúzilik Bank sııaqty halyqaralyq uıymdardyń basshylary men ókilderi qatysty. 

«Taraptar 2016 jyldyń ekinshi jartysyndaǵy álemniń jetekshi ekonomıkalarynyń ósýiniń baıaýlaýymen, álemdik saýda kóleminiń tómendeýimen, Ulybrıtanııanyń EO-dan shyǵýynyń jaǵymsyz áserimen, álemdik qarjy naryqtaryndaǵy qubylmalylyqtyń ósýimen baılanysty negizgi qaýip-qaterler men táýekelderdi talqylady», - delingen habarlamada.

Sonymen qatar, kezdesýdiń jumys sessııalary barysynda qarjy sektoryn reformalaý, ınfraqurylymdy jáne ınvestıtsııalardy damytý, «jasyl qarjy», sondaı-aq terrorızmdi qarjylandyrýǵa qarsy is-qımyl máseleleri talqylandy.

Kezdesý qorytyndysy boıynsha G20 elderiniń ókilderi birlesken kommıýnıke  qabyldady.

«20 tobynyń» qarjy mınıstrleri men ortalyq bankteri ókilderiniń aldyńǵy kezdesýi 2016 jylǵy 14-15 sáýirde Vashıngton qalasynda ótkendigin eske salamyz.